GOED BESTUURDE RENOSTERVELD FNUIK DROOGTE
Noudat die Wes-Kaap so droog is, kan renosterveld wat goed bestuur word, veeboere help, sê mnr. Keir Lynch van die Overberg Renosterveld Bewaringstrust (ORCT).
“As jy in die goeie jare die stukkies renosterveld wat nog in die Wes-Kaap oor is, oordeelkundig bestuur, kan dit in die slegte jare goeie weiding verskaf.”
Die landbou in die Wes-Kaap het reeds verliese van miljarde rand gely vanweë die huidige droogte. Volgens Agri Wes-Kaap is bykans ’n kwart van die provinsie se skaapkuddes en 5% van die ander vee reeds geslag weens ’n tekort aan weiding en voer.
“Daarom moet die beste praktyke vir die bestuur van renosterveldfragmente deel van ’n boerderybestuursplan wees,” sê Keir. “Dit sal verseker dat natuurlike landskappe uit ’n
biodiversiteitsoogpunt gesond is en sodoende waardevolle weiding voorsien.”
Beheerde brande op die regte tyd en die uitroei van indringerplante vorm deel van ’n bestuursplan vir renosterveld en hou talle voordele in.
As beheerde of ekologiese brande reg gedoen is, kan gewenste renosterveldsoorte, soos rooigras (Themeda triandra), blougras (Ehrharta), smaaklike bossies en vygies ná
die brande groei. “Beheerde brande moet om ekologiese redes gebruik word en behoort ’n beoordeling van die veld en ’n beheerde brandstrategie oor vyf jaar, asook ’n beweidingsplan in te sluit.”
Keir sê as daar te dikwels gebrand word, sal belangrike renosterveldsoorte vernietig word. Die ORCT beveel aan dat boere die renosterveld elke 10 tot 15 jaar brand na gelang van die toestand van die veld. “Die uiteinde
is om ’n mosaïek van veld van verskillende ouderdomme op die plaas te skep. Dit bied skuiling aan diere wat in renosterveld leef.”
Die beste tyd om te brand is laatsomer tot vroegherfs. Om in April te brand is in sommige gevalle aanvaarbaar, veral as dit baie ou veld is. Keir waarsku dat plantbolle wat net begin het om hul blare uit te stoot, vernietig kan word as dit laat in die herfs gebrand word. Beheerde brande moet nooit in die winter en lente gedoen word nie.
Nadat veld gebrand is, moet dit vir minstens twee jaar gelos word voor dit weer bewei word.
As dit te gou bewei word, sal die hergroei van smaaklike soorte belemmer word. “Veld wat goed bestuur word, bevoordeel smaaklike en gewenste soorte en verseker op die duur weidinggehalte.”
Aangesien beheerde brande gewoonlik in die “brandtyd” plaasvind, help die ORCT grondeienaars om brandstroke te maak om die risiko van ’n veldbrand te verminder.
Keir sê die ORCT is in vennootskap met die brandbeskermingsvereniging Groter Overberg en die distriksmunisipaliteit Overberg om te verseker dat veilige ekologiese brande plaasvind wat ernstig bedreigde ekostelsels, wat renosterveld insluit, help beskerm.
Die ORCT het onlangs so ’n ekologiese brand onderneem in veld wat die afgelope 30 jaar nie gebrand is nie. Dit is in die Kinko-bewaringsgebied by die Breederivier. Die gebrande gebied is toegespan om beweiding te keer. Indringerplante wat ná die brand groei, sal uitgeroei word.
“Dis deel van die diens wat die ORCT bied, en ons sluit al die komponente in by die geïntegreerde bestuursplanne wat ons opstel vir die boere met wie ons werk,” sê Keir.