TAMATIESAAD KOS AGT KEER MEER AS GOUD
’n Israeliese saadmaatskappy verkoop spesialiteit-tamatiesaad teen sowat agt keer meer as die prys van goud. Hazera se Summer Sun-kultivar is ’n geel kersietamatie met ’n uitsonderlike smaak en kleur.
“Dis ’n unieke en spesiale produk – die heel beste geel kersietamatie ter wêreld,” sê mnr. Yaron Giras, internasionale produkbestuurder vir tamaties by Hazera.
Om Summer Sun-saad in die hande te kry, moet tamatieboere $350 000/kg opdok – teen die huidige wisselkoers raak-raak dit aan R4,5 miljoen! ’n Kilogram goud jaag jou deesdae sowat R530 000 uit die sak.
“Ons verkoop nie baie kilogramme van die saad nie, net ’n paar honderd gram hier en daar, maar die boere wat dit koop, weet hulle gaan báie geld daaruit maak,” sê mnr. Zvi Amit, saadkundige van Hazera.
Luidens ’n berig op www.haaretz.com sukkel Europese kleinhandelaars glad nie om Summer Sun-tamaties teen sowat R360/kg te verkwansel nie. ’n Enkele saadjie lewer gemiddeld 20 kg tamaties op, wat beteken die saad is (baie meer as) sy gewig in goud werd. Volgens die publikasie verkoop Hazera sowat 2 kg Summer Sun-saad per jaar.
Die tamaties is deur Hazera, deel van die Limagrain-groep, met die samewerking van die Hebreeuse Universiteit se fakulteit landbou ontwikkel. Die tamaties het glo ’n “warm” geel kleur wat die oog vang. Die hoë konsentrasie suiker maak dit heuningsoet. Die kultivar bied weerstand teen Verticillium-verwelksiekte (Vd), Fusarium-verwelksiekte (ras 1) en tamatiemosaïekvirus.
Volgens Yaron het boere in Nederland, Frankryk, Spanje, Israel, Marokko, Mexiko en China al van die tamaties verbou.
Summer Sun val onder Hazera se boetiekhandelsmerk, wat ’n reeks uitsoek-tamaties van verskillende groottes en vorms en beter geure en hoë suikervlakke insluit. En, ja, glo Yaron, daar is selfs ’n geleentheid vir Suid-Afrikaanse tamatieboere om hierdie spesiale kultivar te verbou. — LUCILLE BOTHA