RIGLYNE IS NIE VOORSKRIFTE NIE

’n Riglyn gee bloot ’n aanduiding van die bemesting wat kan werk op ’n bepaalde land, sê dr. Pieter Haumann, uitvoerende hoof van die Misstofvereniging van Suid-Afrika (Fertasa).

“Alle saaiboere in Suid-Afrika weet deesdae wat op hul lande aan die gang is en kan nie maklik mislei word nie. Die boer of die landboukundige sal beslis nie blindelings die riglyne aanhou toepas as dit nie werk nie, of wanneer toestande wissel nie.”

Pieter sê Fertasa se handleiding kan ’n goeie aanduiding gee vir ’n boer wat ’n gewas wil verbou op ’n land ten opsigte waarvan geen vorige inligting oor die bemesting bestaan nie. Die grond moet steeds bekyk en ontleed word, en inligting vanaf aangrensende lande, asook enige ander toepaslike inligting oor gewasproduksie in daardie gebied, moet ingewin word.

“Sodra ’n groeityd verby is, kan die boer dan bepaal wat die geslaagdheid van die bemestingprogram was, en daarvolgens aanpassings maak.”

’n Droogte of reeks droogtes kan dié proses heeltemal omvergooi, sê Pieter. “Toestande kon sodanig gewees het dat die riglyne in die kol was en vir opvolgende seisoene toegepas kan word. ’n Droogte of ’n reeks droogtes kan die hele proses natuurlik omvergooi. Net so kan buitengewoon gunstige jare die boer in staat stel om buitengewoon hoë opbrengste te behaal.

“Studies wys dat gewasproduksie nie net oor kunsmistoediening gaan nie. Daar is heelwat ander aspekte wat net so belangrik is, en wat die doeltreffendheid van toegediende kunsmis kan versterk en verbeter.”

Pieter sê verskeie van Fertasa se lede het lankal besef dat biokunsmis ’n groot rol te speel het. Daarom het van die maatskappye daarin belê.

“Net so belangrik is die besef onder lede dat prosesse in die grond wat grondgesondheid verbeter, ook ’n groot rol het om te speel. Die onderwerpe wat op Fertasa se kongresse, slypskole en simposiums aangebied word, bevestig dit.

“Fertasa se lede is bereid om te leer by kenners op ander terreine, en ook om kennis wat oor dekades opgebou is, met alle belanghebbendes uit te ruil.”

Hy voeg by dat Fertasa se lede geloofwaardige en verantwoordelike instellings is wat volhoubare grondvrugbaarheid en plantvoeding voorstaan.

“Fertasa is in sy sestigste bestaansjaar. Dit is nie ’n mylpaal wat behaal word deur ’n instelling waarvan lede die verbruikers van hul produkte mislei nie. Alle riglyne in die bemestinghandleiding is ontwikkel deur wetenskaplike proewe wat in bepaalde toestande uitgevoer is.”