SEIL-SAFARI Somer, son en saffier op Seil-Safari
Suid-Afrikaanse boere van heinde en ver het Laeveld Agrochem se eerste Landbou Seil-Safari van 9-13 April 2018 op die MSC Sinfonia met groot geesdrif ondersteun.
Kaptein, span die seile!
Sowat 1 700 gaste, onder wie plaaslike en internasionale spesialiste op verskeie landbouverwante vakgebiede, verteenwoordigers van landboumaatskappye en -organisasies, asook boere en hul gesinne het op 9 April in Durban se hawe aangemeld om na die Portugese Eiland en Pomene in Mosambiek te vaar.
Vermaak en ontspanning vir die hele gesin was op die spyskaart. ’n Besoek aan die Portugese Eiland aan die Mosambiekse kus op dag twee het geleentheid gebied vir almal om litte los te maak, die warm Indiese Oseaan te geniet en lekker saam te kuier.
Dié ondervinding het die opgewondenheid aan ’n besoek aan Pomene op dag drie laat opvlam, maar, soos op vaste grond, het die weer die laaste sê gehad en kon dié uitstappie weens reën en stormagtige seetoestande nie plaasvind nie. Die klagtes was egter min, want ’n boer kla nie sommer oor water wat val nie.
LEER MEER OP SEE
Vermaak was net een aspek van dié landboukonferensie op see. Die inwin van inligting was hoog op die agenda en die praatjies en inligtingsessies wat reg oor die passasierskip aangebied is, het groot aftrek gekry.
Die visie was om ’n platform te skep waar boere toegang kon kry tot verskeie kundiges. Boere kon vrae vra en netwerke bou sonder tydsbeperkings en ander onderbrekings, sê mnr. Corné Liebenberg, bemarkingsbestuurder by Laeveld Agrochem.
Nuwe tegnologie en ontwikkelinge op die gebied van voedselproduksie het groot aandag geniet. Plaaslike kundiges was onder meer mnre. Dawie Roodt van die Efficient-groep, wat gesels het oor blokketting (blockchain), en Jacques du Toit van Vox, wat oor die Internet of Things (IoT) gepraat het.
Agri SA het saam met ’n groep belanghebbendes ’n voorlegging oor landelike veiligheid aangebied, terwyl internasionale sprekers, soos mnre. Bernold Kemperin van Nederland en Todd L. Cardwell van Amerika, oor die nuutste landboutegnologie gepraat het.
Op die laaste dag van die Seil-Safari het talle landbouverwante maatskappye, waaronder
Landbouweekblad, uitstallings gehou en ’n paar uur lank was die dekke van die MSC Sinfonia in ’n landbouskou omskep.
NUWE SKIP
Gesprekke met van die sowat 900 personeellede wat gesorg het vir die uitstekende kos en diens op die MSC Sinfonia het onthul dat dié reis die laaste vir hierdie passasierskip was voordat dit vervang word met ’n groter en beter weergawe genaamd MSC Musica.
Vir hulle het dit ook ’n bietjie soos ’n vakansie gevoel. Die rede? Hierdie groep was die rustigste, netjiesste en besgemanierde passasiers tot dusver.