WATERBLOMMETJIES LIG KOP OP
Ná drie droë jare lyk dit of die skaarste aan waterblommetjies gebreek gaan word.
Mnr. Erik de Milander van die plaas Oude Muur naby Clanwilliam, een van die weinige boere in die Cederbergstreek wat dié gewas kommersieel verbou, sê die seisoen is laat met goeie reën wat eers teen middel Junie geval het.
“Die oestyd sal aansienlik verkort wees as gevolg van die laat winter, maar ons hoop darem om ’n klompie waterblommetjies te oes.”
Hy hoop om oor ’n maand tot vyf weke te begin oes. Ander waterblommetjiegebiede rondom die Paarl en Wolseley sal waarskynlik al vroeër die mark van dié delikatesse kan voorsien. De Milander kon verlede jaar nie ’n enkele waterblommetjie oes nie. Pryse in supermarkte en groentewinkels het verlede jaar van R60 tot R70 per 500 g-verpakking gehaal, in teenstelling met die vorige jaar se R35-R40/500 g. “Ek glo die pryse gaan afkom en stabiliseer, maar mense kan hulle gereed maak om van R40 tot R50 vir 500 g te betaal.”
Hy sê die taksering van die invloed van die droogte sal eers oor ’n maand gedoen kan word. “Ek hoop nie die skade is te groot nie. Verlede jaar het die kanale en riviere nie water ingehad nie. Hopelik kan ons vanjaar in gehalte en volume vergoed vir die vorige jare.”
Ook by waterblommetjieplase by die Paarl en Wolseley het damme verlede jaar leeg gestaan en is water vir ander vertakkings aangewend. De Milander sê die bedryf sal kan baat vind by studiegroepe. “Die vraag is daar, dit is nie ’n probleem om ’n afsetgebied te kry nie. ’n Studiegroep sal egter kan help dat boere onderling tegnologie uitruil. Dit sal ook ’n eenvormige kwaliteitproduk kan verseker.”