Nuwe reeks met nuwe talente
John Deere is trots daarop om die slimmer reeks S700-stropers aan boere bekend te stel. Dis reeds op Nampo vanjaar aan die massas gewys, maar op die Val-boeredag sal boere dié stroper in aksie kan sien.
Die gevorderdste tegnologie vir die oes van graan is in die plukkerkoppe en fyngraantafels wat John Deere in die 2018-modeljaar van produksie bekend gestel het. Dit sluit vier nuwe S700-stropermodelle in (S760, S770, S780 en S790) wat aan boere beduidende verbeteringe in slimtegnologie bied. Dit bied ook verbeterde operateursgemak en beter data, saam met die reeks 700C/FC-plukkerkoppe en die 700D-fyngraantafel vir die doeltreffender oes van graan.
Die reeks S700-stropers is geskoei op die S600-kombinasiestropers wat in 2012 bekend gestel is, maar dit bevat die nuutste geoutomatiseerde oestegnologie.
“Hierdie nuwe S700-stropers is ’n hoogtepunt van verbeterings aan ons vorige model wat oesbedrywighede vir groot en klein sade optimaliseer en outomatiseer,” sê mnr. Kevin Rippel, bemarkingsbestuurder van die oesproduklyn by John Deere.
“Ons het die intelligensie van die stropers verbeter deur meer aanpassings en kalibrasietake te outomatiseer, en die gebruiksduur, duursaamheid en produktiwiteit van dié uitstekende toerusting te verbeter om ’n hoëprestasie-oesoplossing te skep, anders as enige ander toerusting op die mark.”
NUWE PAKKETTE
Om dit makliker te maak vir operateurs om die prestasie van hul nuwe S700-kombinasie te vergroot, stel John Deere die Combine Advisor™-pakket bekend. Die Combine Advisor™ bevat sewe tegnologieë om operateurs te help om die kombinasie te stel, te optimaliseer en te outomatiseer vir die doeltreffendste oesprestasie gegrond op hul gewas- en veldtoestande.
Auto Maintain is ’n funksie binne Combine Advisor™ wat ondersteun word met ActiveVision™-kameras. Hierdie kameras ontleed die inligting visueel met algoritmes om die optimale dorsprestasie te behou, gegrond op die doelwitte wat gestel is.
Nog ’n toevoeging tot die S700-stropers is Active Yield™-tegnologie wat die massavloeisensor outomaties kalibreer. Dit bespaar tyd deur die noodsaaklikheid vir handkalibrasie uit te skakel en te verseker dat die beste data versamel word.
KAJUITVERANDERINGE
Die grootste opsigtelike verskil in die S700-stroper vergeleke met vorige modelle is in die kajuit. Dit het ’n nuwe CommandCenter™ wat ’n beter gebruikerservaring op John Deere se groter trekkers en selfaangedrewe spuite bied en sodoende klem lê op aanpassing en operateursgemak.
Die masjienprestasiefunksies van die CommandCenter™ sluit in ’n Gen 4-koppelvlak en monitor met 4600-verwerker, CommandArm™ en ’n multifunksie-beheer-hefboom met ’n beter ergonomiese ontwerp en aanpasbare knoppies. Dit het ook premie-aktivering met AutoTrac™, Row-Sense™, HarvestDoc™; Extended Monitor en mobieletoestelfunksies. Daarbenewens sal operateurs vind die opstel en begin is vinniger en makliker danksy meer intuïtiewe skerms.
Die nuwe kajuit het ’n leer- of standaardsitplek wat vir beter sigbaarheid 7,5 grade links en 15 grade regs draai, verhoogde sitplekventilasie vir groter gerief, ’n verbeterde sitplekkussing met ’n opsionele leerstoel, en bykomende graantenkspieëls vir verbeterde sigbaarheid van die graantenk.
NUWE MIELIEKOP EN -PLATFORM
Saam met die S700-stropers stel John Deere die reeks 700C/FC-plukkerkoppe met die RowMax™-ry-eenheid bekend. Die RowMax™-ry-eenheid bied tot ’n 50%-verbetering in die gebruiksduur van die ry-eenheidversamelkettings en bevat soliede boute wat pen- en busslytasie verminder.
“Ons het ook die gebruiksduur van die stoppelrollers met tot 25% verhoog deur ’n harder materiaal te gebruik en ’n nuwe sluitversterking op die voor- en agterkant van die lemme te voeg vir verhoogde prestasie,” sê me. Brittney Guidarelli, produkbestuurder van vooruitstaande toerusting.
“Gevolglik het ons die bedryfskoste verlaag deurdat sluitdele minder dikwels vervang moet word. Boere sal oor vyf jaar ’n besparing van tot $20 000 (’n beraamde waarde van ongeveer R180 000) vergeleke met vorige modelle ervaar.”
Die mielieplukkers van die 700C/FCreeks is beskikbaar in 6-ry- tot 16-ry-modelle in rywydtes van 30 duim tot 36 duim (76 cm tot 91 cm). Die StalkMaster™-opsie is beskikbaar op alle modelle. Voumielieplukkerkoppe is beskikbaar in 12-ry- en 16-ry-eenhede.
Vir klein sade het John Deere die 700D-fyngraantafel, wat ’n 20%-verhoging in vermoë in moeilike oestoestande bied teenoor die vorige model.
Die 700D het ’n topsnyer wat 50% groter in deursnee (nou 18 duim) is met swaar hoë-prestasie-maatwiele, en ’n nuwe invoergordelseëlstelsel wat by kanola die graanverlies van die middelste gedeelte met 45% verminder.
NAVRAE: Kontak jou naaste AFGRI-handelaar vir nog inligting oor die nuwe reeks S700-stropers en ander oesoplossings van John Deere.