Boere leer enkuieropVal
Die immergewilde Valboeredag vind vanjaar oudergewoonte op die eerste Woensdag van Julie op sy plek langs die Val-hotel plaas. Hierdie boeredag beloof om, soos altyd, boere en hul gesinne van heinde en ver te lok om na die verskeidenheid demonstrasies van allerhande landbouwerktuie te kyk.
Die jaarlikse Val-boeredag is ’n ongelooflike geleentheid vir boere uit hoofsaaklik die Hoëveld omgewing om landboutoerusting te sien werk, sê mnr. Lukas du Plessis, takbestuurder van AFGRI Equipment op Standerton.
“Ek glo boere wil die toerusting in aksie sien. Die Val-boeredag stel nooit teleur nie en dit is vir ons almal lekker om gesellig bymekaar te kom. Vir AFGRI Equipment is dit van groot waarde om die nuutste tegnologie ten toon te stel en ook om terug te ploeg in die gemeenskap.”
Vanjaar vind die boeredag op 4 Julie by Val plaas. Jaar ná jaar bied die Waterval-boerevereniging die gewilde skou tussen Greylingstad en Standerton aan.
Trek dus jou plaasskoene aan, smeer die sonbrandroom en kom geniet weer ’n dag belaai met werktuigdemonstrasies.
Die boeredag word elke jaar net groter en groter. Verlede jaar het meer as 2 800 boere deur die hekke geloop en daar was ’n allemintige 143 uitstallers.
Die Val-boeredag is 23 jaar gelede die eerste keer aangebied nadat boere hul behoefte aan demonstrasies van werktuie duidelik gemaak het. Sedertdien kom van die voorste vervaardigers en verspreiders van werktuie en trekkers in Suid-Afrika elke jaar daar bymekaar om hul werktuie se werkvermoë te demonstreer.
Die verskeidenheid masjiene demonstreer verskillende bewerkingsmetodes wat toegepas kan word. Dit sluit in konvensioneel, geenbewerking, strookbewerking, minimumgrondbewerking en beheerde verkeer.
NUUTSTE TEGNOLOGIE
Die tegnologie wat op hierdie boeredag ten toon gestel word, is indrukwekkend – of jy op klein of groot skaal boer. Landboumaatskappye, soos Pannar, AgriCAD, Omnia en die hoofborg, AFGRI, sien die boeredag as ’n gulde geleentheid om hul klante van nader te leer ken. Dit is vir dié maatskappye belangrik om volhoubaarheid in die landbou te verseker. Die doeltreffendheid van dié ondersteuningsnetwerk word bewys deur die aantal besoekers wat elke jaar die geleentheid bywoon.
Die rede hoekom Val die ideale omgewing vir dié demonstrasies is, is omdat die grondtoestande daar so moeilik is. Die turfgrond het ’n hoë klei-inhoud en hierdie tyd van die jaar raak die grond baie hard en gewoonlik is daar baie oesreste.
Wanneer die werktuie dus elkeen oor hul eie strook in die landery beweeg, kry besoekers ’n idee van hoe ’n sekere werktuig sal vaar in hul toekomstige uitbreidings of op hul gevestigde plase.
’n Verdere voordeel is dat boere met vrae dan sommer op dié dag met kenners van die verskillende werktuie kan gesels en onmiddellik terugvoering kry.
MONSANTO
Mnr. Louis Bibbey, Monsanto se verteen-