BRANDSTOF: NOG 'N SKOK WAG IN JULIE
Die verswakking van die wisselkoers oor die laaste paar weke saam met die styging in die ruoliepryse veroorsaak dat Suid-Afrikaners waarskynlik in Julie weer ’n verhoging in brandstofpryse gaan sien.
Mnr. Dawie Maree, hoof van landbou-inligting en bemarking by FNB, sê syfers van die Sentrale Energiefonds het middel Junie ’n onderverhaling van ongeveer 32c/ liter vir diesel en 35c/liter vir petrol getoon. “Dit sal die vierde styging in ’n ry wees in brandstofpryse en sal pryse op rekordhoogtepunte te staan bring.
“Dit is nie goeie nuus vir boere nie. Winsgewendheid is reeds onder druk as gevolg van laer produkpryse en stygings in die pryse van ander produksiemiddele, soos kunsmis wat ook regstreeks gekoppel is aan internasionale ruoliepryse. Boere sal dus in die komende produksietyd haarfyn beplanning moet doen om seker te maak dat hul kontantvloeibegrotings gaan klop.”
Hy sê ongelukkig is diesel ’n nie-diskresionêre uitgawe (’n boer moet brandstof gebruik om te produseer) en boere optimaliseer reeds gebruik sover moontlik.
Vir die nasionale ekonomie is dit ook nie goeie nuus nie. “Mense se besteebare inkomste is reeds onder druk namate die uitwerking van die BTW-verhoging nou besig is om deur die algehele ekonomie te spoel. Die vorige drie brandstofprysverhogings eis ook sy tol in die vorm van hoër vervoerkoste in die voedselwaardeketting en natuurlik in openbare vervoer, waarvan ’n groot deel van die bevolking afhanklik is.
“As gevolg van die uitwerking op inflasie en toekomstige inflasieverwagtings is die vooruitsigte dat rentekoerse vir die res van die jaar stabiel sal wees, met moontlike stygings middel volgende jaar.”