Só kan WhatsApp ’n hele bedryf knou

WAT iemand op sosiale mediaplatforms aanstuur, kan homself en ’n hele bedryf daardeur benadeel. “As jy ’n foto van ’n dooie jakkals neem wat oor ’n draad hang en dit op ’n WhatsAppgroep gaan plaas, is dit daar vir almal om ook aan ander mense te stuur,” het mnr. Paul Lynch van Standard Wool SA op die kongres van die Nasionale Wolkwekersvereniging in Port Elizabeth gesê.

Hy sê die verspreiding van sulke materiaal is baie gevaarlik en die uitwerking daarvan kan ’n dramatiese uitwerking op die hele bedryf hê.

Een voorbeeld wat hy beklemtoon het, is die effek van die verspreiding van ’n video deur die Mense vir die Etiese Behandeling van Diere (Peta) op die bokhaarbedryf.

Mnr. Louis de Beer, bestuurder by Cape Wools, sê die indrukke van stedelike verbruikers oor wol en die radikalisering van die bedryf gaan in die toekoms van hul grootste probleme wees.

“Die stedelike verbruiker sal

op maatskaplike vlak meer bewus wees van dieresorg. Hulle sal teen die landbou gekant wees. Hulle sal geradikaliseer word deur populistiese, aktivistiese organisasies wat ál meer druk gaan uitvoer om die gebruik van lewende hawe vir menslike gebruik te beëindig.”

AFGESTOMP

Hy sê toekomstige wolverbruikers sal stedelinge wees wat verwyder en afgestomp is van die landbou.

Om dié gevaar teë te werk, sal die wolbedryf strategieë moet navors en ontwikkel om ’n gunstige indruk van die wolbedryf by verbruikers te vestig. “Die dae is verby dat jy nie meer weet wie jou wol koop of waarom jou wol

gekoop word nie.”

Volgens De Beer is Suid-Afrika se teikenmarkte, soos China, Noord-Amerika en Europa, reeds ongeveer 75% tot 79% verstedelik.

“Die stedelike verbruikers is metakommunikeerders wat reeds ’n groot invloed uitoefen op die gebruik van vesel in die kleinhandelbedryf. Hulle is bewapen met hul slimfone en Twitter, Facebook en Instagram.”

Om wol aanvaarbaar te hou in die samelewing, moet die bedryf begin verstaan wat wolverbruikers se houding beïnvloed, wat die implikasies daarvan is en watter strategieë ontwikkel moet word om die oorsake te verstaan.