Alle oë op polisie ná Grondwethof se skokuitspraak
MINDER as twee maande ná mnr. Mike Mlengana ingevolge ’n hofbevel in sy pos as direkteur-generaal (DG) van Landbou, Bosbou en Visserye herstel is, is hy wéér van sy magte gestroop.
Dié jongste verwikkeling kom ná Mlengana me. Siphokazi Ndudane, adjunkdirekteur-generaal van Visserye, voorkomend geskors het na aanleiding van bewerings van wanbestuur.
Met Mlengana se skorsing is Ndudane s’n opgehef.
Dit kom ondanks die hofbeslissing in April, ná Mlengana se eerste skorsing, dat mnr. Senzeni Zokwana, Minister van Landbou, Bosbou en Visserye, nie by magte is om só ’n stap te doen nie. Net die President kan.
Mlengana het aan Landbouweekblad gesê hy sal aanhou om korrupsie te beveg, maak nie saak uit watter oord dit kom nie.
“Ek doen dit uit vrye wil en uit liefde vir die boere. Hulle (amptenare) het nie die vermoë om reg met staatsgeld te werk nie en vermors die geld van die belastingbetaler.”
Hy sê hy het Ndudane voorlopig geskors sodat die ernstige bewerings ondersoek kan word.
“Al wat ek probeer doen, is om ’n forensiese ondersoek te laat geskied en die ondersoekers die geleentheid te gee om uit te vind wat gebeur het.”
OMSENDBRIEF
’n Memorandum van Zokwana op 18 Junie vanjaar aan personeel van die departement kondig aan dat Zokwana die magte wat hy aan Mlengana gedelegeer het, met onmiddellike effek teruggetrek het. Zokwana dui aan dat hy pres. Cyril Ramaphosa en die Departement van Openbare Diens en Administrasie van sy besluit verwittig het. Hy het ook die departement se regspan versoek om ’n hersiening van alle ministeriële oordrag van gesag te doen.
Die memorandum sê ook al Mlengana se voorkomende skorsings van verskeie senior amptenare word teruggetrek en dié personeel moet so gou moontlik terugkeer na hul poste.
ONGERYMDHEDE
Daar is 13 beweringe van ongerymdhede teen Ndudane. Dit sluit in dat geen mededingende tenderprosesse met die aanstel van ’n oudit- en forensiese firma gedoen is nie; dat sy nie reken- skap kan gee van ’n boete van R55 miljoen wat aan die departement betaal is vir die stroping van kreef nie; en dat perlemoen verkoop is om geld beskikbaar te stel aan ’n onderneming wat veiligheidsdienste aan die departement moes lewer.
Daar is ook beweringe dat sy die Parlement mislei het met ’n antwoord oor perlemoendiefstal. Sy ontken die beweringe.
LANK REEDS HAAKS
Mlengana is sedert 23 April vanjaar terug in sy pos ná Zokwana hom op 9 Julie verlede jaar geskors het hangende ’n interne ondersoek na beweerde growwe wangedrag. Ná sy tugproses doodgeloop het, het Mlengana hom in November tot die Hooggeregshof gewend. Die hof het beslis sy skorsing is ongeldig en dat dit onmiddellik ter syde gestel moet word.
Mlengana was teen druktyd op kantoor, maar die departement het nie gereageer op versoeke om kommentaar op die kwessie te lewer nie. Die Presidensie en die Departement van Openbare Diens en Administrasie het ook nie gereageer op versoeke om kommentaar nie.
* Hou Landbou.com dop vir verdere verwikkelinge.