Hele bedryf moet hande vat teen bek-en-klouseer
DIE Suid-Afrikaanse veebedrywe sal hulle moniterings en naspeuringstelsels moet regruk indien hulle in die toekoms handelsvennote, soos die Europese Unie (EU), wil behou.
Dit is die waarskuwing van dr. Pieter Vervoort, voorsitter van die nasionale dieregesondheidsforum ná vrese dat die EU Suid-Afrika se status as vry van bek-en-klouseer kan ophef.
Tans blyk die vrese nog net bespiegeling te wees, meen mnr. Gerhard Schutte, hoofbestuurder van die RPO.
Hy sê die veebedryf is wel bekommerd oor die situasie en dit word op vergaderings van die forum bespreek.
“Dit is uiters noodsaaklik dat die regte prosedures en reëls in werking gestel word om hierdie kwessie eens en vir altyd op te los. Ons weet die impak op die veebedryf gaan baie groot wees, met verliese wat teen R6 miljard tot R8 miljard beraam word indien Suid-Afrika se status opgehef word. Daar is egter nog nie ’n uitbreking van beken-klouseer nie en sprake van só ’n opheffing is dus voortydig.”
WANFUNKSIONEEL
Vervoort sê die onlangse uitbrekings van listeriose en slenkdalkoors, asook die ontevredenheid van die EU se gesondheidsinpsekteurs is simp- tome van ’n stelsel wat nie reg werk nie.
“As jou bedryf nie die regte prosedures en reëls in werking het nie, moet jy weet jy gaan die een of ander tyd moeilikheid met jou handelsvennote begin ondervind. Ons moet besef ons inentingsprogramme teen beken-klouseer en slenkdalkoors is nie op standaard nie, terwyl die bewegingsbeheer van vee en naspeurbaarheid ook aandag moet kry,” sê hy.
Vervoort sê dit sal ’n poging van alle belanghebbendes in die bedryf, waaronder bedryfsorganisasies en die Regering, verg om sake te herstel.
“Ons sal moet begin verantwoordelikheid neem vir die stand van sake en vroegtydig optree. Ons kan nie die hele tyd net vure wil doodslaan en eers begin regulasies opstel elke keer wanneer daar ’n siekte uitbreek nie. Ons stelsels sal moet verbeter en dit moet gebeur deur van provinsiale vlak af met die Regering saam te werk en dit uit te brei tot op nasionale vlak.”
Hy sê die meeste handelsvennote verstaan dat geïsoleerde gevalle van siektes voorkom, maar herhalings van siektes en situasies wat buite beheer blyk te wees, skrik handelsvennote af.
SAMEWERKING
Schutte sê die situasie moet onmiddellik aandag kry. Die forum wil op nasionale en provinsiale vlak met die Regering saamwerk om die krisis af te weer.
“As ons kyk na vennootskappe tussen die openbare en private sektor besef ons al hoe meer die voordeel wat daar vir die bedryf is deur met die Regering hande te vat.”
‘Ons moet besef ons entingsprogramme teen bek-en-klouseer is nie op standaard nie.