Vra vir Faffa
VLEISVLIEË IN HUIS
Ek het al verskeie kere ’n brommer doodgemaak en wat my telkens opgeval het, is dat ’n magdom lewende larwes gelê word voor die brommer vrek. Die brommer is grys op die rug, met swart strepe van agter na voor oor die rug, en twee rooi ogies. In al die gevalle het ek die brommer binnenshuis aangetref. Die wetenskaplike naam van die brommer is Sarcophaga haemorrhoidalis en sy algemene naam is die rooistert-vleisvlieg. Die vlieg se gashere is diere en soms mense. Die wyfies bring 30 tot 40 beweeglike larwes voort wat op mis, ontbindende karkasse, wonde of selfs vleis geplaas kan word. Die wyfies kan die larwes op vleis laat val terwyl hulle daaroor vlieg.
Die larwes het stekels wat in bande om al die liggaamsegmente gerangskik is. Al drie die larfstadia kan binne vier dae voltooi word, waarna papies in die grond gevorm word. Die volwasse vlieë kan ná vier dae ontpop, dus kan die lewensiklus in gunstige toestande binne sowat agt dae voltooi word.
Hierdie vlieg is baie nou met die mens geassosieer en kom wydverspreid voor. Dit word baie algemeen in Afrika suid van die Sahara, dikwels rondom menslike woonplekke, aangetref.
Die vleisvlieg veroorsaak soms miase by diere en mense (larwes dring die vel binne deur wonde), maar doen dit blykbaar nie so dikwels soos sommige ander Calliphoridae-vlieë nie.
Dié vlieg kan deur goeie higiëne, veral die behoorlike verwydering van mis, bekamp word.
Besmette wonde moet behandel word.