Die plaas het twee bioverteerders wat saam genoeg energie opwek om ’n dorpie met ’n bevolking van 3 000 van energie te voorsien.
Swaar dragtige koeie word 30 dae voor hulle kalf in hokke geplaas waar hulle gemonitor word. Net voor hulle kalf, gaan hulle na ’n afsonderlike hok. Die eerste nege dae nadat hulle gekalf het, kry die koeie lusern. Nadat die koei haar biesmelk aan die kalf gegee het, word die kalf verwyder en die koei na die melkstal gestuur. Elke koei word vir drie tot vier melksiklusse van tien maande gemelk.
Die plaas se draaitafels kan onderskeidelik 550 koeie en 480 koeie per uur melk. Koeie lewer gemiddeld 37 liter melk per koei per dag. Daar is daagliks drie melkskofte van agt uur elk en drie werkers per draaitafel (sewe uur melk en een uur skoonmaak). Die een draaitafel melk 3 800 koeie per dag en die ander een 3 200 koeie per dag vir ’n totaal van 7 000 koeie per dag.
Die melkery loop elke dag vir 24 uur en lewer 92 miljoen liter melk per jaar. Tien melkmaatskappye koop hul melk op die plaas en bemark dit onder hul eie handelsmerk. Tans kry die boerderye 38 Amerikaanse sent per liter melk, wat omtrent R4,83 per liter was met die toergroep se besoek.
HERGEBRUIK SAND EN MISWATER
Die koeie slaap op sand omdat dit nie-biologies, steriel, sag en betreklik warm is. Die sand word gereeld met skoon sand vervang. Die hokke word skoongemaak met water en ’n skraper stoot alle water, mis, urine en sand in ’n afloopkanaal.
Die lang kanaal het ’n geleidelike helling wat help dat die sand uit die miswater sak.
Die sand word gewas en gesif en daarna tien weke lank gedroog en belug voor dit weer in die hokke gebruik word. Die miswater word opgevang en na bioverteerders afgelei.
Hierdie bioverteerders word gesien as ’n tweede rumen. Dit “verteer” die soliede deel van miswater verder en doeltreffender as die koeie se mae.
In die proses word metaangas afgeskei, waarmee kragopwekkers aangedryf word.
Die plaas het twee bioverteerders wat saam genoeg energie opwek om ’n dorpie met ’n bevolking van 3 000 van energie te voorsien. Dit is dubbel die hoeveelheid energie wat die plaas gebruik. Die oortollige energie word aan die staat verkoop. Die plaas het reeds ’n kontrak van 20 jaar gesluit om teen ’n vooraf vasgestelde prys krag aan die staat te verkoop. ’n Derde bioverteerder word tans opgerig.
Hoewel Adecoagro as ’n groot melkery beskou kan word, lewer hy ’n breukdeel van die melkproduksie in Argentinië, aangesien daar 2,5 miljoen melkkoeie in die land is. Die boerdery wil binnekort nóg twee melktafels oprig en só sy vermoë verdubbel.
GROOT GRAANBOERDERY
Die graanverbouing op die plaas strek oor 24 000 ha waarop mielies, koring en soja in droëlandtoestande verbou word. Op die hele graanproduserende deel word bewaringsboerderypraktyke toegepas.
Die totale jaarlikse reënval van die streek is 1 000 mm tot 1 200 mm per jaar. Danksy hierdie hoë reënval wat eweredig deur die jaar versprei is, kan twee gewasse per stelsel per jaar gelewer word. ’n Tipiese rotasiestelsel vir die plaas is mielies-soja-koring-soja, waar die mielies gemiddeld 10 ton/ha, die soja (eerste jaar) gemiddeld 4 ton/ha, die koring gemiddeld 4 ton/ha en die soja (tweede jaar) gemiddeld 2,5 ton/ha lewer.
Kontrakteurs plant, bespuit, bemes en oes alle graan op die plaas. Die boerdery besit nie werktuie of toerusting nie.
Swakker plekke op die plaas kry minder produksiemiddele en hulpbronne word aan beter plekke op die plaas toegewys om nog hoër opbrengste te verseker.
Die plaas het ook 7 000 ha ryslande wat almal besproei word.
Op hierdie dele van die plaas word ook bewaringsboerderypraktyke toegepas. Die opbrengs is gemiddeld 7 ton rys per hektaar per jaar, wat 1 ton/ha beter as die nasionale gemiddelde vir rysproduksie. Die plaas lewer 20% van die rys in Argentinië.