VERSKUIFBARE WILDVANGBOMA
Die wildboer mnr. Wayne Birch van Burchell Wildlife by Thabazimbi het al twee jaar gelede begin kopkrap vir pasmaak-oplossings om wild beter op sy drie plase te bestuur.
Die uiteinde was ’n ten volle outomatiese verskuifbare vangkraal wat maklik tussen die plaaseenhede verskuif kan word en groepe diere met tegnologiese hulpmiddels, soos kameras, hommeltuie en met behulp van die internet van ’n afstand af te vang.
Die boma word gebruik vir kuddewerk, soos die vang van die aanwas, om jong diere te speen en na ander gebiede te verplaas, asook vir die behandeling van beseerde en siek wild.
Die boma bestaan uit los panele van vierkantpyp wat met stroke vervoerband bedek is. Dit kan binne drie uur op- en afgeslaan word.
Sodra die diere die vangkraal betree op soek na voer en water, word die operateur per selfoon gewaarsku. Die eenheid het vier tot ses valhekke van seil wat almal tegelyk kan afrol om ’n groep diere in die boma in te perk.
Foto 1 toon een van die valhekke wat met behulp van ’n slinger deur een mens opgerol kan word.
Uit die eerste boma beweeg die wild deur ’n drukgang (foto 2, wat ook ’n outomatiese skuifhek aantoon) na sekondêre krale met regstreekse kameradekking, waarvandaan kopers die diere met behulp van internetverbindings op hul slimfone kan bekyk. Sekere wildsoorte, soos swartwitpensbulle, kan met ’n hommeltuig deur die drukgang gedwing word.
Die eerste boma kan met ’n outomatiese skuifhek met ’n afstandbeheerder of internetverbinding per selfoon van die drukgang afgesluit word. Danksy die kameras in die bomas kan die diere van enige plek af met internettoegang op ’n slimfoon besigtig word. So kan beseerde of siek diere ook deur ’n veearts gediagnoseer word. Wayne wys op sy slimfoon (foto 3) wat die kamera in die inlasfoto sien wanneer hy ’n regstreekse beeld uit die vanghok kry. ’n Standaardweergawe van sy vangkraal van sowat R180 000 het twee vanghokke van 6 m x 3 m elk, ’n aanvangsboma, drukgang en laaibank, asook die nodige elektroniese komponente om die wild te kan sien en die elektroniese snellers vir die valhekke en outomatiese skuifhekke vir die aanhou-bomas. Dit het ook ’n sonpaneelstelsel vir kragvoorsiening, rugsteunbatterye en ’n geheuebank vir opnames van die diere. Die laaibank aan die einde van die drukgang (foto 4) kan van sleepwa- tot vragmotorhoogte verstel word. E-pos: