Tientalle voordele by Laeveld Agrochem
Laeveld Agrochem se bootvaart na Mosambiek het meer gebied as net vermaak en jolige samesyn. Verskeie maatskappye het produkinligting aan gaste gegee en dienste bemark.
Laeveld Agrochem se Seil-Safari het die boerderygemeenskap met nuwe idees, produkte en kennis toegerus. Van aanvullings en maklike maaltye tot hulp met belasting en gesondheidsprodukte vir diere is op dié bootreis aan boere bekend gestel.
FARMVET
FarmVet is ’n trotse Suid-Afrikaanse maatskappy met die oogmerk om boere te help met vernuwende, bekostigbare en doeltreffende dieregesondheidsprodukte. FarmVet bring die kan na die man, en lewer op plase af. Persoonlike diens en gemoedsrus is deel van die Laeveld Agrochem se belofte van ondersteuning die afgelope 28 jaar.
Die lys produkte sluit in antibiotika, middels teen inwendige en uitwendige parasiete, asook middels om wonde te behandel.
Dit kan by vee en troeteldiere gebruik word.
BOEREBRANDSTOF
Boerebrandstof, ’n nuwe gesondheidsdrankie, wat die brein en gewrigte ondersteun, is spesifiek ontwerp vir boere wat daagliks harde, fisieke arbeid verrig en flink besluite moet neem en probleme oplos. Dit is boonop geskik vir mense met diabetes.
Boerebrandstof word bemark as ’n “brein- en gewrigsgesondheidsdrankie”, wat Gaba, Peptan®en Palatinose™ bevat.
Gaba kan beskou word as die “neuro-boodskapper” wat chemiese boodskappe deur die brein en senuweestelsel oordra en kommunikasie tussen die breinselle beheer.
Gaba kan die volgende voordele inhou: Kalmering en voorkoming van angs; Die verbetering van die gemoedstoestand; Die vermindering van pyn of krampe; Die bevordering van die menslike groeihormoonproduksie; en Hulp met konsentrasie en fokus. Peptan® is kollageenpeptiedes wat identies is aan die kollageen wat in die menslike been en vel voorkom. Dit kan beskou word as ’n sterk, maar buigsame gom wat die mens se liggaam bind en die vorm hou waaraan ons gewoond is.
Die gesondheidsvoordele van Peptan® is deur verskeie kliniese navorsingstudies bewys, waaronder beter gesondheid en die herstel van vel, been, kraakbeen, spier, bindweefsel en gewrigte.
Palatinose™ (isomaltulose) word beskou as ’n natuurlike “slimsuiker”.
Hierdie koolhidrate verskaf energie in ’n meer gebalanseerde manier deur stadiger vrystelling in die bloedstroom. Dit word opgeneem met ’n laer glukemiese effek (4 kcal/g of 4,184 kJ/g). Dié bestanddeel is geskik vir diabete en word ondersteun deur intense kliniese studies en navorsing.
GENESIS
Genesis® Dual Pouch is ’n wetenskaplik geformuleerde voedingsdrankie met 55 kernvoedingstowwe. Elke 100 g bevat 100% van jou daaglikse behoefte vir al 12 vitamiene en voorsien in ’n volwassene se energie- en voedingstofvereistes.
Die Genesis® Dual Pouch bestaan uit twee sakkies – een met water en een met poeier. Jy druk en draai volgens die aanwysings waar die twee sakkies verbind om die seël te breek en meng dan die twee dele saam. Die maaltyd in ’n sakkie is ideaal vir mense wat in die buitelug werk. Dit verskaf bogemiddelde voeding en is ’n vinnige maaltyd.
DIESELRABATSTELSEL
FMSolutions se geoutomatiseerde dieselrabatstelsel voldoen aan die Suid-Afrikaanse Inkomstediens (SAID) se dubbele logboekvereistes.
FMSolutions verskaf ’n brandstofbestuurstelsel aan boere, brandstofdepoteienaars, vervoermaatskappye en myne.
Identifiseringstegnologie outomatiseer logboeke en identifiseer watter werktuig aangehaak is. Hierna doen dit verslag oor jou trekker se dieselverbruik, waar dit gebruik is en watter take die trekker of voertuig verrig het.
Die SAID mag eise vir tot vyf jaar evalueer nadat ’n rabat geëis is. FMSolutions hou die nodige inligting om enige eise te staaf. Die diens is bekostigbaar, gebruikersvriendelik vir administrasiepersoneel en vir werknemers en operateurs in die veld. Dit bied wolkgebaseerde intydse data wat doeltreffende monitering en bestuur ondersteun.
TAX RECOVERIES
Tax Recoveries spesialiseer in die hantering van indirekte belastings, soos BTW, dieselrabatte en werknemersbelasting (PAYE). Tax Recoveries doen ’n oorsig van jou transaksies tot en met vyf jaar terugwerkend en maak seker jy het nie te veel belasting betaal nie en identifiseer waar belasting teruggeëis kan word.
Die diens geskied op ’n gebeurlikheidsgrondslag, en dus is daar nie ’n uurlikse tarief nie. Die boer en Tax Recoveries deel die voordeel slegs as besparings bewerkstellig kon word. Alle interaksies met die SAID word met goeie oordeel gedoen. Die doel van die proses is besparing vir die boer binne die wetlike raamwerk van belastingverpligtings.