Dié tegnologie onontbeerlik vir boerderye
Die frase “the internet of things”, oftewel toestelle wat met behulp van die internet werk, word deesdae gereeld gebruik. Dié wisselwerking binne ’n netwerk van datapunte gee aan telekommunikasiemaatskappye, soos Vox, nuwe geleenthede om kliënte te bedien
Vox was een van die maatskappye wat aan boord was tydens die Seil-Safari-bootreis saam met boere en belanghebbendes in die landboubedryf.
Verskeie nuwe oplossings wat IoT- (“the internet of things”) tegnologie inspan, gee aan verbruikers die opsie om veilige, bekostigbare en eenvoudige toestelle met ’n lae kragverbruik op klein of groot skaal te gebruik.
Die “things” in die IoT-afkorting dui op enige toestel wat met elektronika, rekenaarprogramme en sensors aan ’n netwerk gekoppel is en data versamel. Wanneer hierdie tegnologie saam met groot datastelle gebruik word, kan boere beter bestuur toepas, waaronder die veiligheid van vaste en roerende bates, soos duur vee of wild.
Namate verbruikers se behoeftes verander om betreding, die hantering van bates, soos voertuie, of die beweging van diere in verafgeleë dele van ’n plaas beter te monitor, pas Vox daarby aan.
Vox het homself geposisioneer as ’n neutrale netwerkverskaffer wat tegnologie, soos NB-IOT, LTE-M1, LoRa en Sigfox, ondersteun.
“Die nuwe ontwikkelinge is soos Beta teenoor VHS,” sê mnr. Jacques du Toit, uitvoeren- de hoof van Vox.
Vox het ’n vennootskap gesluit met Sqwidnet, die verskaffer van Sigfox-tegnologie in Suid-Afrika. Sqwidnet bied dienste en toerusting teen die laagste koste met tegnologie wat in meer as 42 lande gebruik word.
Toestelle met ’n lae kragverbruik, soos WAN-tegnologie (Sigfox en LoRa), werk goed in situasies waar toestelle klein hoeveelhede data oor ’n afstand moet stuur, terwyl die batterykrag jare kan hou.
Dit onderskei LPWAN van ander koordlose netwerkprotokolle, soos sellulêre tegnologie, wat bandwydte en reikafstandvermoë betref.
“Die Sigfox-netwerk is uniek omdat torings inligting oor lang afstande kan stuur – tot 90 km of selfs meer – vanaf ’n enkele, onopsigtelike basisstasie met ’n lae kragverbruik en min uitlaatgasse,” sê Jacques.
OPSPORING
Opsporingstegnologie steun gewoonlik op GSM-netwerke, wat duur is om te installeer en te onderhou, en boonop baie krag gebruik vir die transmissie van data, sê Jacques.
GSM-toestelle is kwesbaar vir seinblokkeerders en dit verhoog jou blootstelling aan diefstal. “Afgesien daarvan dat ons tegno- logie dit baie moeilik maak vir boewe om ’n sein te blokkeer, is ons IoT-toestelle selfaangedrewe met batterykrag. Dit is dus nie afhanklik van die elektrisiteitsnetwerk nie. Ingeboude sensors meet die temperatuur, batterylewe en posisie en sal ook aandui as iemand met die toestel peuter of dit verskuif.”
Inligting word normaalweg op voorafbepaalde intervalle gestuur en die battery kan tot tien jaar hou.
Die toestelle kan van 2 tot 140 datatransmissies per dag stuur na gelang van die verbruiker se behoefte. Teen 140 transmissies per dag is dit een elke kwartier en in daardie geval sal die batterylewe uiteraard korter wees.
Alle telemetriese inligting word versamel, ontleed en aan die eindverbruiker (of groep) deur ’n webwerf of slimfoontoepassing oorgedra.
Danksy die lae koste verbonde aan IoT-toestelle en dienste vergeleke met GSM-netwerke is daar geen SIM-, aansluitings- of datakoste nie.
Outomatisering en kunsmatige intelligensietegnologie sal help om werksvloei en besluitneming te vergemaklik wat uit die magdom data kan spruit.
VEILIGHEID
IoT-toestelle kan ook deel vorm van ’n sekuriteitstelsel. Skelms wat onregmatige toegang tot jou plaas, skure of beveiligde gebiede op die plaas of in jou huis wil bekom, sal hulle vasloop teen Vox se vroeë “Tamper Alert”-waarskuwingstoestelle.
Dit waarsku jou as iemand by ’n deur, venster of hek inbreek. Hierdie toestel werk vir tot tien jaar met batterykrag en die sein kan nie maklik geblokkeer word nie. Dit stuur ook dadelik ’n sein as iemand met die toestel peuter.
Voertuie se ligging, spoed, enjinprestasie en selfs die bestuurder se vernuf kan ook met IoT-toestelle gemonitor word.
VIR DIE PLAAS
Vox het vir boere IoT-produkte ontwikkel wat spesifiek vir veebestuur gebruik kan word, naamlik reproduksie, voer, hittewaarneming en geboorte.
Slimnekbande met liggewigsensors word daarvoor gebruik. Dit is maklik om te gebruik en oorbrug die probleme wat soortgelyke stelsels het rakende opvangs en batteryleeftyd.
Die eienaar of plaasbestuurders kan geografiese grense stel, diere se bewegings en ligging monitor, en ook aanduiders vir ongewone gedrag instel om ’n waarskuwingsboodskap te stuur.
Al die inligting word deur die stelsel ontvang en ontleed en in ’n gebruikersvriendelike formaat saamgevat vir maklike interpretasie.