DIEANDERSÊ
AKADEMICI, aktiviste en beleggers bespiegel reeds lank oor die bestaan van ’n “koolstofborrel” – bates in fossielbrandstowwe wat tans oorgewaardeer is omdat die wêreld op medium- en lang termyn die vrystelling van kweekhuisgasse drasties sal moet verminder. Hierdie nuwe studie, wat onlangs in die joernaal Nature Climate Change gepubliseer is, wys dat ’n kwaai daling in die waarde van fossielbrandstowwe hierdie borrel kan laat bars en sê só ’n daling sal waarskynlik voor 2035 plaasvind, gegrond op huidige energiegebruikspatrone.
Wat van deurslaggewende belang is, is die bevindings wat te kenne gee dat ’n snelle daling in die vraag na fossielbrandstowwe nie meer afhang van sterker beleid en stappe van regerings oor die wêreld heen nie. Die skrywers se modelle gee te kenne dat die vraag sal daal selfs as die belangrikste lande geen nuwe klimaatsbeleid aanvaar of vorige ondernemings laat vaar nie.
Dit is omdat vooruitgang ten opsigte van energiebesparing en hernubare krag, asook die prysdalings wat daaruit voortspruit, reeds die sogenoemde groen energie ekonomies en tegnologies aantrekliker gemaak het.
“Sonder sterk beleid oor klimaat gebeur dit reeds,” sê dr. JeanFrançois Mercure, die hoofouteur, wat verbonde is aan die universiteite van Radboud en Cambridge. “In ’n sekere mate kan jy dit nie keer nie. As mense egter nou ophou om hul geld in fossielbrandstof te belê, kan hulle minstens hul verliese verminder.”