Grondwaarde bied geleenthede
MNR. JOHAN HOLTZHAUSEN, mede-eienaar van die Ortusboerdery by Lydenburg, het applous by dié verhoor oor onteiening sonder vergoeding uitgelok toe hy vertel hoe hy 111 ha van die boerdery se grond aan ses families op die plaas wil gee.
Die boerdery verbou onder meer aartappelmoere, mielies en voergewasse en erken volgens hom die belangrikheid van grondhervorming. Holtzhausen sê hulle werk saam met die Regering en wil ’n suksesvolle onderneming vestig, maar benadruk dit is belangrik vir ’n boerdery se oorlewing dat die grond wat hy gebruik, waarde het.
“Die grond wat ons besit, is vol geleenthede. Omdat dit waarde het, het ek toegang tot bykomende finansiering. As ek dít nie het nie, kan ek nie suksesvol boer nie, en as ek nie suksesvol kan boer nie, kan ek nie my gemeenskap ondersteun nie.”
Holtzhausen het gevra wat die oogmerk met die moontlike verandering van die Grondwet is en hoop dit is om mense op die grond volhoubaar te bevoordeel. Hy sê hy moet die ses huishoudings op hul plaas meer as grond gee: Hy moet hulle die geleentheid gee om volhoubaar daar te boer, in vennootskap met die Regering, en met mense wat finansiering bied.
“Ek pleit by u om die wysiging van die Grondwet baie versigtig en met verantwoordelikheid te oorweeg.”
Daar was ’n sterk EFF-teenwoordigheid by die vergadering. Mnr. Vincent Smith, medevoorsitter van die parlementêre hersieningskomitee wat moet bepaal of die Grondwet verander moet word, het in ’n stadium sy hande vol gehad om oproerige gehoorlede stil te kry sodat ander se menings gehoor kan word. Eindelik was dit mnr. Julius Malema, die EFF-leier, wat die gehoor tot bedaring gebring het met versoeke om kalmte.