Parmalat sluit stakende werkers uit
NAGENOEG 700 werknemers van die melkverwerker Parmalat word sedert 27 Junie die maatskappy se persele in die Wes-Kaap, OosKaap en KwaZulu-Natal belet nadat die vakbond Food and Allied Workers Union (Fawu) met ’n beskermde staking begin het.
Volgens mnr. Thabo Moselane, nasionale sektororganiseerder en -onderhandelaar van Fawu, is sowat 700 werkers by die staking betrokke. Werkers in Gauteng neem nie aan die staking deel nie.
Mnr. Chris Vermeulen, Parmalat se uitvoerende direkteur vir menslike hulpbronne, sê in ’n verklaring die uitsluiting sal voortduur tot die staking amptelik verby is.
Die dooiepunt tussen die maatskappy en die vakbond handel oor Fawu- geaffilieerde werkers se eis vir hoër lone en nóg een vir ’n billiker bepaling van werkers se jaarlikse en maandelikse aansporingsvergoeding.
Parmalat bied ’n verhoging van 7,3% aan. Fawu het aanvanklik 12% geëis, maar dit is later verlaag tot 9%, en eindelik 7,5% teruggedateer tot 1 Mei, met ’n bykomende 0,5% wat op 1 Julie in werking tree. Parmalat was nie daarvoor te vinde nie.
AANSPORINGS
Moselane sê ongeskoolde en halfgeskoolde werkers op die laagste diensvlakke ontvang ’n jaarlikse aansporingsvergoeding van R1 500. Bo dié vlakke ontvang personeel aansporingsvergoeding gelykstaande aan een maand se salaris. Bestuurders van tenkvragmotors, wat op die B-vlak is, ontvang ’n maandelikse aansporingsvergoeding van R4 000 en ’n maand se loon as ’n jaarlikse aansporingsvergoeding.
Vakbondlede het aanvanklik geëis die maandelikse aansporingsvergoeding vir fabriekwerkers en bestuurders by verspreidingsentrums moet dieselfde as dié van die bestuurders van tenkvragmotors wees. Ná bespreking is die eis aangepas tot ’n maandelikse aansporingsvergoeding van R1 000, waarvan 25% bepaal sal word volgens kriteria, soos teenwoordigheid en prestasie, sê hy.
“Parmalat sê egter hy gaan nie oor aansporingsvergoeding onderhandel nie, want dit word betaal volgens die maatskappy se diskresie.”
GEEN STEMMING
Vermeulen sê in sy verklaring die kennisgewing om te staak is sonder ’n stemproses uitgereik, maar Moselane sê ’n stemming was onnodig omdat werkers oorwegend ten gunste daarvan was.
Parmalat het nie gereageer op versoeke om kommentaar nie.
–