KAAPSE VEEKUNDIGES BRING WAARDE UIT NIEU-SEELAND
Drie veekundiges van die Wes-Kaapse departement van landbou, prof. Schalk Cloete en drr. Anel Engelbrecht en Jasper Cloete, wat die Wêreldkongres vir Genetika Toegepas op Veeproduksie in Nieu-Seeland bygewoon het, kon al die nuutste navorsing oor diereteelt en teeltvordering by plaasdiere terugbring.
Die kongres word elke vier jaar aangebied. Dit is vir die 11de keer van 11 tot 16 Februarie aangebied en is deur sowat 1 400 afgevaardigdes uit 70 lande bygewoon. Bykans 900 wetenskaplike bydraes is aangebied.
Vir die 36 wetenskaplikes en studente van Suid-Afrika wat die kongres bygewoon het, was dit ’n goeie kans om menings uit te ruil met oorsese kollegas en moontlikhede vir toekomstige samewerking te ondersoek.
Bywoning van die kongres het daartoe gelei dat verskeie stappe gedoen is om die navorsingsprogram van die Wes-Kaapse departement van landbou te versterk deur aandag te gee aan die volgende aspekte: ■ Die verbetering van veedoeltreffendheid; ■ Die gebruik van aangepaste rasse, bloedlyne en individue indien die klimaat wesenlik sou verander; ■ Die verbetering van die eetgehalte
van skaapvleis; ■ Die aanpassing van seleksiedoelwitte om vir maatskaplike aspekte en etiese produksiepraktyke voorsiening te maak; ■ Die daarstelling van ’n ekonomiese
seleksie-indeks by volstruise; en ■ Die ontwikkeling van ’n genomiese verwysingsbevolking by skape saam met Australiese kollegas.