‘Boere betaal vir gehalte’
Die vraag na en aanbod van vee is bepalende faktore tot die pryse wat diere op veilings behaal. Kundiges in die bedryf gee hier hul mening.
Die goeie genetiese eienskappe van diere wat waarde tot jou kudde kan toevoeg, is die grootste enkele rede tot goeie pryse op ’n veiling, veral op stoetveilings, sê mnr. Willie Meyer, hoof van veilings en eiendomme by GWK.
Die pryse van diere wissel van veiling tot veiling, maar Willie sê die gehalte van ’n afgeronde dier het beslis ’n invloed op die prys.
“As die dier boonop goeie groei-eienskappe toon, sal dit ’n goeie prys behaal, want dié eienskap sal altyd in aanvraag wees. Wanneer die aanbod van spesifieke diere laag is, sal dit ook die prys gunstig beïnvloed.”
OOIE DUURDER
Willie sê hulle het in die eerste helfte van die jaar opgemerk dat kopers bereid is om goeie pryse op stoet- en aanteelveilings te be- taal vir diere van goeie gehalte.
“Boere ontvang goeie pryse vir diere, maar veral die pryse van ooie het skerp geklim. Stoorlammers verhandel teen rekordpryse en dit kan regstreeks gekoppel word aan die lae aanbod. Die verwagting is dat die slagprys oor die volgende paar weke kan toeneem,” sê Willie.
“Pryse word verder gesteun deur die goeie pryse wat vir wol behaal word.”
Willie sê daar is ’n groter aanvraag na stoorlammers.
“Die vraag na wol-tipe stoorlammers is veral baie hoog danksy die lae aanbod van dié spesifieke diere.”
Mnr. Cobus Oberholster, hoofbestuurder van lewende hawe, eiendomme en afslaersdienste by BKB, sê die neiging wat hulle die afgelope ses maande op stoetveeveilings opgemerk het, is dat die kommersiële gedeelte van stoetveeveilings groter word.
“Waar die stoetteler in die verlede hoofsaaklik stoetramme en ’n paar vroulike diere aangebied het, bied hy nou baie meer boervee, soos dragtige ooie en lammers, aan. Dié lammers word gekoop deur abattoirs, voerkrale en boere wat ekstra weiding, voer en mielies het. In enkele gevalle is tot 6 000 stuks vee só aangebied.”
BKB sien ook dat nie-stoetboere in die sentrale streek, wat tradisioneel hul aanteelvee uit die hand verkoop het, nou eerder die veilingstelsel gebruik.
“Groot getalle word aangebied, wat dit makliker vir kopers maak,” sê Cobus.
SPEENKALFPRYS AF
Veeboere beleef ’n goeie tydperk wat pryse betref, sê Willie.
“Die speenkalfprys het egter effens gedaal. Dit is verstaanbaar weens veral die Oos-Kaapse speentyd. Ons sien egter uit na ’n goeie jaar vir alle veeboere.”
Die afgelope paar jaar se droogte het beslis ’n rol gespeel in die aanbod van diere, en dit het gelei tot hoër pryse, sê Willie.
“Weens die droogte moes heelparty boere van diere ontslae raak, hetsy deur verkope of deur die diere te slag. Gevolglik is die heropbou van kuddes nou ’n groot voorrangsaak vir boere.
“Voerkrale ervaar groot probleme met die verhouding van aankooppryse teenoor slagpry- se. Die verhoogde bedryfskoste met veral brandstofpryse wat onlangs die hoogte ingeskiet het, asook voerkoste veroorsaak verder noemenswaardige druk.”
Die vraag na ligte speenkalwers bly hoog, want die prys is aan die dier se gewig gekoppel.
“Ligte kalwers het in die eerste helfte van die jaar goeie pryse behaal. Die swaarder kalwers het moeiliker verhandel weens die prysdifferensiaal. Die vraag na koeie met kalwers en bulle van goeie gehalte bly hoog en hulle behaal goeie pryse op veilings.”
GEVOLGTREKKING
Cobus sê die hoë pryse wat boere die afgelope 18 maande op veilings vir diere behaal het, gaan waarskynlik met 15-20% daal. Verskeie faktore kan egter steeds goeie pryse ondersteun, soos die uitwerking van die droogte.
“Die droogte wat Suid-Afrika tot onlangs in die noorde geteister het, en in dele van die Karoo en Wes-Kaap voortduur, het steeds ’n beperkende invloed op die aanbod van vee in dié gebiede,” sê hy.