Dik groentesop met frikkadelle
Dik, vullende groente- of tamatiesop met klein, kaserige frikkadelletjies wat in die geurige vloeistof gaar prut, is ’n eg Italiaanse ete. Tog benodig jy net doodgewone spenskasbestanddele. Stel dit gerus op die proef. Dit is ’n soort sop wat sy man as volledige ete kan staan. Jy hoef niks hierby te bedien nie.
Sop
15 ml olyfolie 1 groot ui, fyn gekap 4 knoffelhuisies, fyn gekap 4 wortels, geskraap en in blokkies gesny 2 stele seldery, fyn gekap 2 liter vleisaftreksel 80 ml tamatiepasta 2 blikke (410 g elk) tamatiepuree Sout, peper en suiker na smaak 60 ml fyngekapte, vars pietersielie
Frikkadelle
500 g maer beesmaalvleis Halwe ui, fyn gerasper 2 knoffelhuisies, baie fyn gekap 125 ml vars broodkrummels 125 ml fyngerasperde parmesaankaas Sout en vars gemaalde swartpeper na smaak 1 groot eierwit, liggies geklits
Verhit die olie in ’n groot soppot en braai die ui, knoffel, wortels en seldery stadig daarin tot sag. Voeg die aftreksel, tamatiepasta en tamatiepuree by en verhit tot kookpunt. Geur na smaak met sout, peper en ’n knippie suiker. Voeg die pietersielie by. Prut liggies vir ongeveer 10 minute.
Terwyl die sop prut, meng al die bestanddele vir die frikkadelle baie goed saam. Vorm klein frikkadelletjies en laat sak dit versigtig in die kokende sop. (Die sop moet net liggies prut. As dit te vinnig kook, sal die frikkadelletjies uitmekaar val.) Prut die sop met die frikkadelle liggies vir ongeveer 15 minute, of tot die frikkadelletjies gaar is. Lewer 6 porsies.