VYEBOERE OPTIMISTIES ONDANKS DROOGTE

Ondanks die droogte wat steeds in die grootste deel van die vyeproduksiegebied in die Wes-Kaap geheers het, is boere optimisties oor die afgelope seisoen.

Volgens mnr. Willem van der Merwe van die Dasklip-boerdery naby Porterville, was die afgelope seisoen ’n probleem weens die droogte, maar is hy steeds optimisties danksy goeie opbrengste en goeie uitvoerpryse.

Hy sê dit wil egter voorkom asof Porterville in die toekoms gunstig vir produksie kan wees vanweë die warm, droë klimaat, hoewel die bome steeds water nodig het. Hy voer die meeste van sy vye uit, met die kultivar Ronde de Bordeaux, wat hoofsaaklik vir die Nederlandse mark bestem is, en die kultivar Bourjassotte Noire (Evita/Parisian) wat vir die Ooste en Brittanje bestem is.

Volgens mnr. Jan Eksteen van die Uitkijk-boerdery naby die Paarl, het hy ook die afgelope seisoen as gunstig ervaar. Hy sê weens die droë winters die afgelope tyd was ’n hoër soutkonsentrasie in die boorde ’n probleem wat oeste kon benadeel, maar dat hy sy besproeiingspraktyke verander het en die regte middels kon toedien.

Hy sê die sterker rand in die somer het wel ’n effek op die uitvoerpryse gehad. Die pryse is egter redelik stabiel, aangesien Europese en Britse kopers die Suid-Afrikaanse produk begin leer ken het. Hy lewer ook vye aan die plaaslike kleinhandelmark en sê die vraag na vars vye groei jaarliks.