Sussex blink uit op Bloemskou
Die Sussex-beestelersgenootskap van Suid-Afrika het op 1 Mei sy nasionale kampioenskapskou in die Rosestad op die Bloemskou gehou. Die ras het boonop met die hoogste eerbewys in die interraskompetisie (vleis- en dubbeldoel) weggestap.
Vanjaar se nasionale Sussex-kampioenskapskou op die Bloemskou het deelnemende telers se vernuf en hul keuse vir die skouring teen mekaar opgeweeg. Die hoogste eerbewys het gegaan aan die raskampioenbul, Huntersvlei Kimberley die 12de, en die raskampioenkoei, JRE100009 Huntersvlei Verity die 74ste, albei van Platdrif Sussex.
Twaalf telers het deelgeneem en altesaam 60 diere is vertoon. Die Huntersvlei-stoetery van die Rhys Evans-groep en Platdrif Sussex het puik gepresteer. Die verbintenis tussen dié stoeterye is ’n aanwins vir die ras en genootskap.
In sy strewe om net die beste beskikbare teelmateriaal te gebruik, het mnr. Nollie Stofberg van Platdrif Sussex by Worcester in die Wes-Kaap in 2016 die bul Huntersvlei Kimberley die 12de op die nasionale veiling in Bloemfontein teen ’n rekordprys van R200 000 van die Huntersvlei-stoetery gekoop. (Lees ook op bl. 18.)
Benewens die genetiese voordele wat Kimberley die 12de vir die Platdrif-kudde inhou, het die bul vanjaar met die topprys in die nasionale kampioenskap, die raskampioenskap en die Absa-interraskompetisie (opperste kampioen, vleis- en dubbeldoel) weggestap. Platdrif het ook die interraskompetisies gewen vir die beste twee diere wat nageslag van dieselfde moeder is, die beste paar en die senior kampioenbul.
Die wenners in die verskillende afdelings is: BULLE
Raskampioen en senior kampioen: Platdrif met JRE 13 0156 Huntersvlei Kimberley die 12de. Reserwe senior kampioen: Huntersvlei met JRE 14 0144 Huntersvlei Kimberley die 24ste. Junior kampioen en reserwe raskampioen: Huntersvlei met JRE 16 0004 Huntersvlei Sparkle die 1ste. Reserwe junior kampioen: JRE 16 0157 Huntersvlei Bonaparte die 2de. Fase C-kampioen: Advocate met MCC 16 0009. Fase D-kampioen: Pothou met PSS 16 6111.
VROULIKE DIERE
Raskampioen en senior kampioen: Platdrif met JRE 10 0009 Huntersvlei Verity die 74ste. Vrugbaarheidskampioen, reserwe senior kampioen en reserwe raskampioen: Huntersvlei met JRE 10 0109 Huntersvlei Dandelion die 254ste. Junior kampioen: JRE 16 0013 Huntersvlei Verity die 119de. Reserwe junior kampioen: Platdrif met AJS 16 0029 Platdrif Magda die 69ste.
AGTER DIE SKERMS
“Om ’n kampioenskapskou aan te bied, is ’n groot taak, maar met ’n gedugte span Sussextelers, raadslede en sekretaresse was dit ’n voorreg,” sê me. Daleen Potgieter, president van die genootskap.
“Dit kan nie sonder borge gedoen word nie. Omdat deelnemende telers baie uitgawes het, wil ons dit vir hulle die moeite werd maak. Ons het goeie ondersteuning ontvang en vertrou die Sussex-genootskap sal nog ’n lang, gelukkige pad met elkeen stap, veral omdat ons in 2020 die eeufees van Sussex in Suid-Afrika vier,” sê sy.
“Niemand kon die uitroep en gejuig deur die Sussex-ondersteuners mis toe die Sussexbul Kimberley die 12de as wenner in die interraskompetisie aangewys is nie. Nie almal kan ’n eerste plek behaal nie, maar elkeen was reeds ’n wenner omdat hulle bereid was om die ras te ondersteun, en nie toegelaat het dat tyd, geld en moeite in die pad staan nie,” sê Daleen.
Die beoordelaar, mnr. Willie de Jager, het ’n moeilike taak maklik laat lyk en die ringgids, mnr. Robert Harris, het alles in die ring georden gehou. Mnr. Chris Nel, Sussexteler, was die aankondiger en me. Trudie Bouwer het al die administrasie behartig. Me. Sonja Wasserman, sekretaresse van die genootskap, was ’n steunpilaar.
“Groot dank aan almal wat agter die skerms gewerk het. Rooi Goud is ons trots, en met ’n span soos dié kan die Sussexgenootskap net helderder skitter!”