Hoërskool Oakdale se belegging in die toekoms
Die Hoërskool Oakdale het op 23 Januarie sy Sussexstoetery ontvang. Daarmee het die Sussexstoetery Veeplaas/Oakdale as volwaardige teler deel geword van die Sussexfamilie.
Die Sussexstoetery van die Hoërskool Oakdale is moontlik gemaak deur samewerking tussen die PLAASlandboujeugstigting en die Sussex-telersgenootskap. Die projek het gegroei uit die Veeplaas-kuddeprojek wat nou reeds by 14 landbouskole kuddes gevestig het.
Die stoetery is nie die eerste Sussexbeeste op Oakdale nie. Die aanvanklike beeste is deur ’n ouer van die skool geskenk. leerders kry in graad 10 opleiding in vleisbeeste in die vak landboubestuurspraktyk.
Die Sussexbeeste word ook gebruik tydens deelnames aan jeugskoue en die ALFAjeugprogram, wat vanjaar die eerste keer tydens Nampo Kaap aangebied gaan word.
Sussextelers wat diere beskikbaar gestel het, is mnre. Dawie Albertyn (Nacht Wacht), Nico Bouwer (Witkwas), regter Callie Cillié (Advocate), mnre. Johan du Randt (Mountain Shadows), David Evans (Huntersvlei), Gert Fourie (Kyknou), Chris Nel (Eversar), George Potgieter (Pothou), James Stephen (Vigorex) en Theo van Zyl (Faurzyl).
“Hartlike dank aan die skenkers wat hul weg oop gesien het vir hierdie groot skenking. Sedert die veiling tot en met die aflaai het Dawie Albertyn die verse gehuisves en versorg. Ons is hom groot dank verskuldig vir hierdie onbaatsugtige daad,” het die Hoërskool Oakdale laat weet.
Mnr. Pieter Stofberg is die mentor vir die kudde om te verseker dat hulle aan die Sussex-rasstandaarde sal voldoen.
Volgens Pieter het die verse goed ontwikkel en aangepas in die droë Wes-Kaap.
“Ons het op 1 Oktober die bul (van Dawie Albertyn) by die verse geplaas. Die bul is einde van November uitgehaal. Die bestuur en kinders van Oakdale neem geesdriftig deel aan die projek,” sê Pieter.