Nuwe strooier ideaal vir presisieboere
BPI, ’n Suid-Afrikaanse werktuigvervaardiger, het ’n revolusionêre strooier by sy reeks werktuie gevoeg, naamlik die PS-13T. Dié presisiestrooier het ’n ekonomiese werksverrigting en kan opgegradeer word.
Boere wil méér as net ’n werktuig hê en gevolglik is dit die werktuigvervaardiger BPI se benadering om presies dit te bied. Naverkopediens word behartig deur 146 handelaars landwyd. In elke provinsie is ook streekverteenwoordigers wat met hul produkkennis kan help met die instel en kalibreer van werktuie om gehaltediens te verseker.
Die PS-13T-strooier is toegerus met ’n Isobus-presisierekenaarstelsel. So ’n stelsel is van groot waarde in Suid-Afrikaanse toestande. Hierdie strooier se unieke ontwerp is gegrond op stabiliteit, voorkoms, sterkte en akkuraatheid.
GOEIE GEHALTE
Verskeie faktore beïnvloed boere se besluite, soos die soort graangewas, die omgewing, rywydtes en grondformasies. Met wielsporing van 1 800 mm tot 2 700 mm bied die PS-13T waarde vir geld én gemoedsrus.
Danksy ’n unieke ontwerp kan die PS-13T van 30 kg tot 3 000 kg kunsmis per hektaar plaas. Strooiwydtes wissel van 12-30 m, na gelang van die digtheid van die materiaal.
Die PS-13T, en alle ander werktuie in BPI se reeks, verbeter voortdurend danksy die inisiatief en ervaring van BPI se bestuurs- en ingenieursafdelings. Die maatskappy lê klem daarop om op die voorpunt te bly van tegnologie in die landboubedryf.
DIE VOORDELE
Die PS-13T is geskik vir mediumgroot en kommersiële boere. Die onderstel is ontwerp om gewig van tot 20 ton met gemak te dra. Nog ’n voordeel is die J2-suspensie, wat die verdigting van materiaal in die laairuimte uitskakel.
Die PS-13T-strooier is met die ideale balans ontwerp. Slegs 2% van die totale gewig word op die trekker se sleepstang geplaas.
Nog ’n voordeel is die minimale gebruik van olie, met ’n olievloei van net 90 liter per minuut. As die boer sekere kalkprodukte wil strooi, is ’n olievloei van slegs 35 liter per minuut nodig. Dit beteken minder slytasie, asook minder verhitting in die oliestelsel.
Met ’n totale hoogte van sowat 2 440 mm is die PS-13T ideaal vir enige gewone laaihoogte en die ideale opsie vir doeltreffende verspreiding.
Ekstra bykomstighede sluit in ’n elektries beheerde seil, ’n sif vir growwe materiaal, nagsighulp, kameras, elektroniese vragmonitering en ’n hidrouliese parkeerpoot.
Die PS-13T sleep soos ’n droom en hanteer met gemak in uiterste omstandighede.
Dit is ’n werktuig wat vernuwende, uitnemende gehalte en betroubaarheid bied.
Dit is die antwoord vir enige boer wat op soek is na ’n presisiestrooier. Die PS-13T is slegs een van verskeie strooiers van verskillende groottes, vir vele aanwendings.
BOU WERKTUIE SELF
BPI ontwerp, ontwikkel en bou verskeie werktuie, wat wissel van skeur- (ripper) en skottelploeë (disc ploughs) tot balers en stropers, en is gevolglik nie afhanklik van eksterne verskaffers nie.
’n Goed gevestigde handelaarsnetwerk van verskeie koöperatiewe en private ondernemings bedien boere in Suid-Afrika en omliggende gebiede.
Die maatskappy lê klem daarop om op die voorpunt te bly met werktuie vir die landboubedryf.