NOORD-KAAP BEWAAR AFRIKANERSKAPE

Die Noord-Kaapse departement van landbou onderhou twee bewaringskuddes van die bedreigde, inheemse Namakwa-Afrikanerskaapras op navorsingsplase by Upington en Carnarvon.

Dié geharde skaapras kan in die toekoms van belang wees by veranderde boerderytoestande weens klimaatsverandering.

Namakwa-Afrikanerskape het weerstand teen uitwendige parasiete, soos bosluise, toon minder uierprobleme en het ’n goeie reproduksievermoë. Aangesien Namakwa-Afrikaners se vleisopbrengs swakker is as rasse wat al dekades vir groei en vleisproduksie geselekteer is, word die ras nie op groot skaal in boerderye gebruik nie, sê prof. Schalk Cloete van die Wes-Kaapse departement van landbou.

“Hulle is maerder, wat voordelig kan wees as dit die oogmerk is om maer en gesonder vleis te lewer, maar hulle het ’n klomp gelokaliseerde vet in die stert waarvoor ’n boer nie noodwendig betaal word nie.”

Volgens dr. Gretha Snyman van die Departement van Landbou, Bosbou en Visserye op Grootfontein het Namakwa-Afrikanerskape swart koppe en ’n langer stert, terwyl Ronderib-Afrikaners van die blinkhaar- of steekhaartipe kan wees. Hul lywe is wit en hul sterte is korter en dikker.

Sy sê die departement het ook ’n embriobank met sowat 300 embrio’s. Die Noord-Kaapse departement van landbou verkoop elke jaar oortollige diere aan belangstellende boere.