Soja-oes verras ná moeilike seisoen
Mnr. André Bezuidenhout boer net buite Welkom in die Vrystaat met gesaaides en vee op sy plaas The Prairie. Hy verduidelik waarom hy Pannar se sojaboonpakket van PAN 1521R en PAN 1623R gebruik.
Pannar se verkoopsverteen-woordiger in Welkom, mnr. Le Roux (Botter) Breytenbach, is mnr. André Bezuidenhout se regterhand as dit by kultivarkeuses kom. “Dit is nou die vierde jaar dat ek op groot skaal met sojabone eksperimenteer. Ek kan bevestig dit het wél ’n plek by ons, veral as die bemestingsprogram korrek toegepas word en die reën reg val,” sê Bezuidenhout.
Nog ’n konsultant, mnr. Bennie de Klerk van Multi Green, kuier saam op die plaas. Hy werk nou saam met Bezuidenhout en Breytenbach en behartig die bemestingsprogram.
“Ons kan nie sonder ons konsultante en agente boer nie,” sê Bezuidenhout. “Ek plant al langer as 30 jaar proewe met koring en ander gewasse om kultivars se aanpassing en prestasie in hierdie omgewing te bepaal. Dit is belangrik om proewe te plant om die winsgewendste keuse vir jou plaas te maak.”
AANBEVELING
“Ons het ’n twee-van-die-bestes-kombinasie gebruik om die risiko met groeityd te versprei, naamlik PAN 1521R en PAN 1623R. Albei dié kultivars het ’n goeie wortelstelsel. In die sanderige grond met minder as 10% klei is dit nodig om die regte kalktoedieningsprogramme toe te pas om die kultivars die beste kans te gun om hul opbrengspotensiaal te verwesenlik,” sê Breytenbach.
PAN 1521R het buitengewoon stabiele opbrengsprestasie oor al die produksiestreke, hetsy in koel, matige of warm gebiede. Dit bied ’n wenkombinasie van stabiele prestasie oor seisoene, opbrengsprestasie en goeie agronomiese eienskappe. Met die R-agtervoegsel kan boere verseker wees van PAN 1521R se glifosaatverdraagsaamheid.
Bezuidenhout gebruik Roundup (reg.nr. L0407, Wet 36 van 1947) in sy onkruidbestrydingsprogram. As deel van groeiklas 5 (medium) is hierdie kultivar ook geskik vir effens later aanplanting. Ná die afgelope somer se laat reën was dit ’n nuttige eienskap.
PAN 1623R is ’n langer groeier en val in groeiklas 6. Dié opbrengsleier bied ongeewenaarde opbrengspotensiaal en stabiliteit.
Vroeë aanplantings in die gematigde streke is ideaal en PAN 1623R kan met gemak die hoofaanplanting in warm droëlandgebiede wees. Opbrengsdata onderskryf die aanbeveling van PAN1623R vir die matige, oostelike gebiede, asook die westelike droë, gematigde gebiede. Hierdie kultivar het ’n sterk, robuuste plant met ’n goeie staanvermoë wat die rye vinnig toemaak. Danksy die sterk wortelstelsel is dit ook geskik vir die watertafelgronde in die westelike produksiestreek.
DEURMEKAAR SEISOEN
Die toestande was nie ideaal nie. Bezuidenhout het ná die eerste goeie somerreën verlede jaar op 4 Desember geplant.
“Gewoonlik plant ons van 20 Oktober tot 10 November,” sê Bezuidenhout. “Die sojas moes eintlik teen 10 Desember al mooi gestaan het, maar ons moes na die natuur luister en later plant. Weens die laat reën en laat plantdatum het ons besluit om vooraf 60 kg stikstof per hektaar in die grond te sit.
“Die sojas het baie mooi rhizobium-knoppies gemaak en ’n sterk wortelstelsel ontwikkel. Dit was die eerste keer dat ons soveel stikstof toegedien het. Hoewel die toestande aanvanklik nie goed gelyk het nie, het dit eindelik tot ons voordeel uitgewerk.”
WINSGEWEND
Toe die stropers op 26 April vanjaar begin loop, het Bezuidenhout besef die proefneming was geslaag.
“Ons het 2,3 ton/ha gestroop. Dit is beslis winsgewend en volgende jaar sal ons meer as die huidige 45 ha beplant.”
Hulle het teen ’n stand van 280 000 plante per hektaar geplant met ’n rywydte van 1,5 m. Tydens planttyd is hy veral op presisie toegespits en daarvoor staan sy Monosem-presisieplanter gereed. “Die grondvog moet korrek wees as jy plant, maar die plantdiepte op 2 cm is net so belangrik.” Hy pas konvensionele bewerking toe.
Sy droëlandaanplantings kry jaarliks van 550-650 mm reën. Die afgelope somer se laat reënval het uiteindelik vir hom reg uitgewerk. “As jy jou insetkoste vir saad, bemesting en bewerking opweeg teenoor die inkomste wat jy uit ’n goeie sojaboonopbrengs kan maak, klop die somme goed,” sê Bezuidenhout.