Beesboere kan help met voedselsekerheid
Die gehalte en soort teelmateriaal van beeskuddes in Afrika kan ’n bydrae lewer tot voedselsekerheid. Veeboere moet dus kan staatmaak op onder meer afslaers om hulle van inligting te voorsien.
Mnr. Louwrens Viljoen is ’n jong boer wat spesialiseer in die teling van Charolais-stoetbulle. In 1942 het sy oupa grond naby Clocolan in die Vrystaat gekoop. In 1968 het sy pa, Coenraad, die boerdery oorgeneem en sedert 2007 boer Louwrens, die derde geslag van die Viljoens op die plaas, heeltyds saam met sy pa.
Louwrens het op ’n jong ouderdom kennis gemaak met dié beesras omdat sy pa al in 1967 Charolais-beeste gekoop het.
BEGINDAE
Louwrens het in 2005 op die jaarlikse nasionale veiling van die Charolais-beestelersgenootskap op Kroonstad drie koeie aangekoop. Louwcoe Charolais het tot stand gekom danksy sy liefde vir boerdery, sy vermoë om noukeurig met beeste te werk, spesifiek die Charolais-ras, en sy pa se aanmoediging om ’n lewenstaak te maak van dít waarvoor jy lief is.
Louwrens is al 13 jaar lank daarop toegespits om die heel beste Charolais- en poena-Charo- lais-teelmateriaal te bekom en daarmee te teel. Hy lê veral klem op die feit dat die poenabees baie vleis op sy karkas dra.
VOEDSELSEKERHEID
Me. Kathleen Lombard, advertensieen korporatiewe identiteitsbestuurder by André Kock en Seun, die afslaersonderneming wat Louwcoe Charolais se veilings hanteer, sê weens die verhoogde druk op landboubedrywe wêreldwyd sien hulle toenemend dat internasionale beleggers potensiële landboubedrywe in Afrika ondersoek.
“Elders in Afrika is daar enorme beeskuddes, maar dié kuddes is nog nie ontwikkel om meer en beter produkte aan die wêreldmark teen ’n laer koste en verhoogde volumes te lewer nie.
“Internasionale aankopers wil stoetbeeste by telers aankoop wat die ekonomiese en genetiese aspekte van beesboerdery, die plaaslike klimaatstoestande en die verandering in die markwaarde van rooivleis ten volle in ag geneem het in sy teelproses.”
Kathleen sê die internasionale vraag na telers in Afrikalande gaan die hoogte inskiet, veral na ’n teler soos Louwrens met sy hope geesdrif, ervaring en doelgerigte visie vir die soort en gehalte Charolais-stoetbeeste wat hy teel.
Voedselsekerheid is wêreldwyd ’n probleem en die bekamping van wanvoeding is slegs een van die struikelblokke wat die landboubedryf moet oorkom. Die Landbou-vooruitsig 20172026, ’n verslag wat deur die Organisasie vir Samewerking en Ontwikkeling met die samewerking van die Verenigde Nasies se Voedsel- en Landbou-organisasie opgestel is, dui aan ’n verhoging van 80% in uitsette of produksie is wêreldwyd in die landboubedryf nodig om voedingstekorte te bekamp. Die twee faktore wat veral daartoe sal bydra, is die verhoging van opbrengs van produkte en die verbouing van nuwe of bykomende landbougrond. Die vermeerdering in landbougrond sal egter net ’n 20%-verhoging in produksie kan lewer. Gevolglik moet Suid-Afrika se landboubedryf daarop klem lê om die opbrengs van produkte te verhoog.
KLIËNTEDIENS
André Kock en Seun, afslaers van lewende hawe met meer as 50 jaar ervaring in die rooivleisbedryf, sê goeie dienslewering was deurslaggewend tot die maatskappy se sukses. Mnr. Malcolm Kock, die vierde geslag, bestuur dié familieonderneming. Hy het ’n groot bydrae gelewer tot die maatskappy se suksesvolle uitbreiding na die Vrystaat, Limpopo en meer onlangs na Lichtenburg in Noordwes.
Een van die redes waarom André Kock en Seun in ’n mededingende en onstabiele bedryf oorleef, is omdat die maatskappy sy kliënte as familie beskou. Die maatskappy se filosofie is dan ook “In diens van die Veeboer”.
Kathleen sê dit is hul plig as konsultante aan veeboere om te weet wat die toekoms vir hul bedryf inhou.
“Ons bestudeer nuwe ekonomiese en landbou-inligting en kommunikeer noukeurig met die bedryfsnetwerk wat ons oor vyf dekades opgebou het. Ons verwerk al dié inligting om weer aan ons kliënte deur te gee. ’n Baie interessante tydperk wag op Suid-Afrikaanse boere en ons is opgewonde om nuwe inligting aan ons kliënte oor te dra.”