Klop hiér aan vir puik diens
Die beste diere verdien die beste veilings. Hetsy GWK Veilings hom dus besig hou met stoetvee, wild, veilingsaanbiedings, vee, administrasie of kliëntediens, gehalte is altyd die wagwoord.
Wanneer kliënte die GWK-handelsmerk sien, weet hulle dadelik waarvoor die maatskappy staan, sê mnr. Willie Meyer, hoof van GWK Veilings.
“Ons het ’n gemotiveerde span mense wat saam ons doelwit najaag om GWK Veilings te vestig as die voorkeuronderneming vir veilingskliënte,” sê hy.
Die dienste wat GWK aan sy kliënte bied, sluit in stoetveeveilings, landwye kommersiële veilings, wildveilings, algehele uitverkopings, en staakboerdery-, losgoed- en eiendomsveilings. Die span behartig ook skakeldienstransaksies waar verhandelings van die plaas af gedoen word.
Omdat GWK Veilings deel van die GWK Groep is, sê Willie kan die maatskappy selfs meer ondersteuning aan kliënte bied, soos die slag van vee by verskeie GWK-abattoirs.
“GWK verskaf ook finansiering en versekering. Hierdie omvattende diens beteken ’n gehaltediens vir gehaltediere word deur ’n gehaltespan moontlik gemaak,” sê hy.
Gevolglik brei GWK Veilings se span spesialiste deurlopend uit om die diens waarvoor hulle bekend is aan meer kliënte te kan lewer. Met kantore in die Vrystaat, Noord-Kaap en OosKaap word veilings reg oor Suid-Afrika gehou. Die resultate wat op hierdie veilings behaal word, versterk die naam en reputasie wat GWK Veilings opgebou het.