Boek oor plaasmoorde sal talle wakker skud
DIE nuwe boek Kill the Boer lewer ’n belangrike bydrae tot die debat oor plaasmoorde en -aanvalle, sê ’n kenner van misdaad.
Dit is veral die geval in dié tyd dat plaasmoorde en -aanvalle klaarblyklik ’n ongemaklike, netelige en politieke onderwerp vir bespreking geword het. Só het dr. Johan Burger, ’n oudpolisieman en konsultant vir die Instituut vir Sekerheidstudies (ISS), gesê met die mediabekendstelling van die boek van mnr. Ernst Roets, adjunk- uitvoerende hoof van AfriForum.
“Die boek sal hopelik tot die debat bydra en sommige van ons wakker skud wat steeds in algehele onkunde oor die erns van die situasie leef,” het Burger gesê.
Dit is vir hom irrelevant of ’n mens met al die standpunte en bevindinge in die boek saamstem. Wat belangrik is, is dat die boek tot die debat bydra.
OMVATTEND
Dr. Theo de Jager, voorsitter van die Wêreldboere-organisasie, het op die bekendstelling gesê Roets pak die onderwerp van plaasmoorde op omvattende wyse.
Hy skryf oor “die feite en syfers, asook die vrese, woede en bekommernisse wat deel geword het van die DNS van die boerderygemeenskap”, het De Jager gesê.
Volgens De Jager gaan die boek ongetwyfeld omstrede wees en sal dit kritiek en sekerlik meer debat plaaslik én internasionaal uitlok.
De Jager het gesê as ’n mens ’n toneel van so ’n aanval – met die tekens van marteling – besoek het, verloor jy jou aptyt “vir teoretiese debatte oor die relevansie van die statistieke of syfers”.
Volgens hom kan niemand ontken dat plaasmoorde in Suid-Afrika deur buitengewone wreedheid en marteling gekenmerk word nie.
De Jager sê Roets slaag daarin om te wys hoekom plaasmoorde spesiale aandag, maatreëls en stappe regverdig.
“Dit is geen oplossing om sake in eie hande te neem nie. Nie boere, die polisie of ander veiligheidsmagte kan plaasmoorde op eie houtjie beëindig nie. ’n Vennootskap – in die waarste sin van die woord – tussen die openbare en die private sektor is nodig.”
VENNOOTSKAP
De Jager is ’n trotse lid van ’n noue vennootskap tussen Agri Limpopo, TLU Noord, die African Farmers’ Association of South Africa (Afasa) en die polisie in Limpopo. Dié vennootskap het nie net ’n aantal plaasaanvalle voorkom nie, maar ook tot een van die hoogste sukseskoerse met inhegtenisnemings en vervolgings van oortreders in onlangse jare gelei. “Dit werk,” het hy gesê.
De Jager hoop kritiek op Roets se boek sal met “verifieerbare feite en logiese redenasies” gelewer word, nes die boek geskryf is.
Roets het gesê in die eerste deel van die boek voer hy redes aan waarom plaasaanvalle uniek is, nie as gewone misdaad beskou kan word nie en as ’n voorrangmisdaad benader moet word.
In die tweede deel lig hy tien redes toe waarom die Regering aan die aanvalle aandadig is.
Kill the Boer word uitgegee deur Kraal Uitgewers en is in boekwinkels beskikbaar.