VravirFaffa

Wat is die beste metode om weidings te vestig?

Die meeste aangeplante weidingsoorte is veredelde kultivars van natuurlike grasse. Die aanname is dikwels dat die saad net op die grond uitgegooi kan word en dan sal opkom.

Saad is te duur om dit te doen. Jy moet ’n goeie saadbedding voorberei. Hier volg ’n paar redes oor waarom mislukkings voorkom.

■ Los saadbedding. Indien die grond te los is, lei dit gewoonlik tot groot vogverlies. Kompaktering met ’n roller of drukwiel net ná die vestiging is belangrik om die saadbedding ferm te kry en om die saad in noue kontak met die grond te bring.

■ Grondvog. Die ondergrond behoort tydens die vestiging genoeg vog te bevat om goeie ontwikkeling van die kiemplant te verseker.

■ Onkruid. Jong grasplante is meestal gevoelig vir mededinging. Onkruidbestryding is dus noodsaaklik om vestiging te verseker.

■ Vestigingstyd. Tropiese (somer-) en gematigde (winter-) gewasse het spesifieke vestigingstye. Plant somergewasse van Oktober tot Desember. Meerjarige soorte kan ook in Februarie geplant word mits genoeg reën val. Wintergewasse kan van Februarie tot April (warm dele) geplant word. Plant op droëland as reënval normaalweg in die gebied val.

■ Swak saad. Die meeste soorte grassaad het ’n minimum vereiste ten opsigte van suiwerheid en ontkieming. Koop die saad by ’n erkende handelaar om gehalte te verseker en dring aan op ’n bewys van gehalte.

■ Ongeduld. Menige goeie vestigings is al te vroeg uitgeploeg weens die boer se ongeduld.

VOORBEREIDING VAN DIE SAADBEDDING

Indien ’n ploegsool of enige ondeurdringbare laag in die ondergrond voorkom, behoort die grond diep geploeg of met ’n skeurploeg bewerk te word as eerste bewerking. Gewoonlik het sanderige grond nie so ’n diep bewerking nodig nie.

’n Ploegbewerking word soms om ander redes vereis, byvoorbeeld vir onkruidbestryding. Die onkruid word dan diep ingewerk. Dit voorkom vinnige hergroei en mededinging. Daarna kan die grond een tot drie keer met ’n wisselgangskotteleg, tandwerktuig (skoffel) of kapploeg bewerk word om ’n fyn, onkruidvrye saadbedding daar te stel.

Dit is egter belangrik om te onthou dat enige bewerking ’n los saadbedding tot gevolg het, wat probleme met ontkieming kan skep. ’n Rolbewerking, besproeiing of ’n harde reënbui (op die regte tyd) sal help om die saadbedding te konsolideer. ’n Reënbui is nie altyd moontlik nie en daarom kan ’n roller gebruik word. Om die saadbedding net voor planttyd te rol en ook net daarna, word buitendien aanbeveel sodat die grassaad goed kan vestig.

Waar kweekgras natuurlik voorkom, moet liefs net tandwerktuie gebruik word, want skaarploeë hervestig die kweek. Die voorbereiding van die saadbedding moet dan oor ’n langer periode strek (van die eerste reën in die seisoen tot einde Januarie). Dit is om alle “hardnekkige” grasse, soos kweek en fynsaadgras, deur herhaalde bewerking en bespuiting met Roundup (reg.no. L7769, Wet 36 van 1947) dood te maak en dan nuwe weiding in Februarie te vestig.