BESPREEK SONDER MOEITE VIR BLWK-KONFERENSIE
BELANGSTELLENDES kannou sonder moeite vir Bewaringslandbou Wes-Kaap (BLWK) se jaarlikse BLWK Jack Human-bewaringslandboukonferensie op 7 en 8 Augustus bespreek.
Die konferensie is op Dinsdag 7 Augustus by die Houwhoek Inn, Grabouw. Die praktiese dag is op Woensdag 8 Augustus op die navorsingsplaas Tygerhoek buite Riviersonderend.
Die praktyk van beheerde spoorverkeer word op die konferensie “deurgetrap”. Kom luister wat mnre. Trevor Syme, ’n boer van Wes-Australië, en Hume Schönfeld, ’n boer van Caledon, daaroor te sê het.
Mnr. Clint Della Bosca, ’n boer van Wes-Australië en voorsitter van die Wes-Australiese geenbewerkingsboerevereniging (WANTFA), gaan meer vertel oor sy ervaring met boerdery in ’n lae reënvalgebied.
Mnr. Izak Dreyer, ’n boer van Vrede in die Vrystaat, gaan oor dekgewasse en beweiding praat en mnr. Andries van der Poll, ’n nuwe era graanboer van Gouda, gaan oor sy vordering praat.
Die verrigtinge word afgesluit met praatjies oor onlangse navorsing deur dr. Craig Galloway, navorser oor volhoubare landbou by Trace & Save, oor grondgesondheid in weidings en dr. Hendrik Smith van Graan SA en me. Lorren de Kock van Blue North oor die koolstofspoor van koringproduksie in die WesKaap.
PRAKTIESE DAG
Proewe wat op Tygerhoek besoek word, sluit in dekgewasse en opvolggewasse, ’n skyfplanterproef met verskillende saaidigthede en kunsmis met plant, ’n luserninsaaiproef, ’n proef oor mikrobiese funksionele groepe en proewe vir ’n biologiese benadering tot gewasbeskerming en die opbou van grond.
Dit kos R800 per persoon om die konferensie én praktiese dag by te woon. Studente betaal R600. Mense wat net die praktiese dag wil bywoon, betaal R200 en studente R100.
Bespreek op die Quicket-aanlynbesprekingswebwerf by http://qkt.io/9bbSE5 NAVRAE: Dr. Johann Strauss, sel 082 907 3109