NÓG SLEGTE NUUS OOR BRANDSTOFPRYSE

Nog slegte nuus wag op verbruikers oor brandstofpryse. Volgens alle aanduidings teen die middel van die maand kom daar ’n vyfde opeenvolgende verhoging in die prys aan die begin van Augustus.

Mnr. Dawie Maree, hoof van landbou-inligting en bemarking by FNB, sê syfers van die Sentrale Energiefonds het in die middel

van Julie gedui op ’n onderverhaling van ongeveer 17 c/ℓ vir diesel en 21 c/ℓ vir petrol.

“Die wisselkoers én die internasionale produkpryse is verantwoordelik vir die moontlikheid dat ons waarskynlik weer ’n verhoging gaan hê en dit lyk nie of die einde in sig is nie.

“Graanprodusente sal beslis vir die komende produksietyd haarfyn moet beplan om te verseker hul kontantvloeibegrotings gaan klop. Dit is juis nou die tyd van die jaar wanneer produksiebegrotings en -beplannings opgestel word.”

Maree sê vir die mens op straat en die nasionale ekonomie is dit uiteraard ook nie goeie nuus nie. “Die rekordhoë brandstofpryse gaan net verder toeneem. Die effek van die vorige stygings in pryse is nou besig om sigbaar te word in onder meer voedselpryse en die prys van ander produkte. Die prys van openbare vervoer word natuurlik ook daardeur geraak en dus word die laer inkomstegroepe verder benadeel.”

Die prys van loodvrye petrol sal waarskynlik in Augustus tot ’n nuwe rekordvlak van sowat R16,23/ℓ styg en diesel se groothandelprys tot sowat R14,61/ℓ. In Maart het petrol nog R13,76/ℓ gekos en diesel R12,09/ℓ.

Maree sê die verwagting is steeds dat die Reserwebank die rentekoers onveranderd sal laat, maar daar is definitief inflasiedruk in die ekonomie en dit kan in die toekoms die bank se siening verander.