WÊRELDBEKENDES PRAAT OP PHILLIPSTOWN SE JONGOOISKOU
WOLBOERE kon op vanjaar se derde Philipstown-jongooiskou eerstehands hoor waarheen hul wol gaan en wat die wêreld van Suid-Afrika se wolboere verwag.
Mnr. Peter Ackroyd, voorsitter van prins Charles van Engeland se wolveldtog en voorsitter van die Internasionale Woltekstiel- organisasie (IWTO), het aan die boere gesê hoewel wol slegs 1,2% van die internasionale tekstielbedryf beslaan, het dit ’n volhoubare storie om te vertel.
“Daarby het Suid-Afrikaanse boere ’n wonderlike ekologiese storie om aan die wêreld te vertel.”
Dié jongooiskou is enig in sy soort in Suid-Afrika. Volgens mnr. Diederik Vermeulen, organiseerder, het hy vanjaar besonder moeite gedoen om wolboere met ander belanghebbendes in die wolwaardeketting in aanraking te bring.
“Dit is die eerste keer dat iemand in so ’n hoë amp met die boere kom gesels. Dit was vir ons ’n groot eer. Dit was veral goed om te hoor wat die internasionale markte van Suid-Afrikaanse boere benodig,” sê hy.
“My mikpunt was om boere in kennis te stel van wat met Suid-Afrikaanse wol gebeur wanneer dit die land verlaat,” sê Vermeulen.
Anders sprekers was mnre. P eter Carey, handel s bestuurder in Suid-Afrika van die Australiese wolkoper Lempriere, Wolf Edmayr, besturende direkteur
van BKB, Herman Hugo, wat ingestaan het vir Guillau du Toit as voorsitter van die Nasionale Wolkwekersvereniging, en Geoff Kingwill, voorsitter van die volhoubare werkgroep van die IWTO.
KYK EN VERGELYK
Vermeulen het die skou drie jaar gelede begin ná hy besef het só ’n dag bied die ideale geleentheid vir verskillende jongooiklubs om by mekaar te leer.
“Almal van ons het dieselfde belang, naamlik wol. Klublede kan hul ooie vergelyk en gedagtes uitruil, want elkeen boer op sy eie manier, maar elkeen kan iets by ’n ander een leer.”
Verskeie ramtelers kon ook hul ramme tentoonstel.
“Dit bied die telers die geleentheid om hul ramme voor hul veilings te vertoon. Indien jy as boer dan enige eienskappe binne jou kudde soek, kan jy nou hier die ramme kom uitkies volgens die eienskappe wat jy benodig.”
Die Modern Merino-klub het vanjaar die derde agtereenvolgende keer as die wenner van die skou weggeloop. Kraankuil was tweede en Philipstown derde. Vyf klubs het aan die kompetisie deelgeneem.
Mnre. Eddie Prinsloo van Heuningkrans en Gawie van Wyk van die NWKV was die beoordelaars. Van Wyk het volgens ’n puntestelsel beoordeel en Prinsloo volgens die hand-oogmetode.
Volgens Prinsloo was die gehalte van die ooie besonders en was dit interessant dat die twee wenooie wat met die hand-oog-metode geklas is, ook as wenners in die puntestelsel aangewys is.
EENVORMIGE WENNERS
Mnr. Willem Retief, een van Modern Merino se telers, meen die wenuitslag is vanweë min variasie tussen verskeie kenmerke binne hul groep jong ooie, aangesien al die boere hul ramme by een boer koop.
Volgens Vermeulen is die mikpunt om die skou volgende jaar verder uit te brei om klubs van die Wes-Kaap in te sluit.