NOORD-KAAPSE WYN BREEK LANSIE IN STERK SWART VERBRUIKERSMARK
Danksy deeglike navorsing het Orange River Cellars in die Noord-Kaap ’n wynhandelsmerk staangemaak wat die kol tref in die florerende swart verbruikersmark.
DeLush, wat in 2016 bekend gestel is, het in die eerste jaar 2,5 miljoen liter wyn verkoop. Tans trek verkope by 4 miljoen liter en die Noord-Kapenaars jaag die doelwit na om teen 2020 altesaam 10 miljoen liter van hierdie gewilde wyn te bemark.
Dié halfsoet wyn het ’n lae alkoholvlak (slegs 7,5%) en bevat geen verwysing na streek of kultivar op die verpakking nie. Dit is spesifiek gerig op modieuse, swart, stedelike vroue. Navorsing toon swart, stedelike vroue tussen die ouderdom van 18 en 28 jaar is die grootste wyndrinkers in Suid-Afrika. Statistieke wys ook dat soet rooiwyn die gewildste is onder hierdie wyndrinkers.
“Die handelsmerk is baie goed nagevors. Ons het ses handelsmerke voorberei, waaruit die fokusgroepe toe self DeLush gekies het,” sê mnr. Koos Visser, bemarkingsbestuurder van Orange River Cellars.
Hy sê hulle het besef onlangse groei in plaaslike wynverkope was onder nie-tradisionele wyndrinkers. Om in dié kategorie mee te ding, moes hulle aan wynliefhebbers gee wat hulle graag wou hê: Aantreklike verpakking en ’n fantastiese smaakervaring wat by die jonger verbruikers se lewenslustige en moderne leefstyl pas. Dit was koebaai vir die tradisionele wynfaktore, soos wingerde, druifsoorte en geografiese ligging, want dit is nie belangrik vir verbruikers in hierdie segment nie. Vir hulle is ’n lekker naam en sterk handelsmerk veel beter. DeLush-wyne kos R129 per 5 l-boks en R84 vir ’n 3 l-boks.
“Sowat 80% van alle wyn in Suid-Afrika word vir minder as R40 per liter verkoop,” sê Koos.
Gauteng (Johannesburg) en KwaZulu-Natal (Durban) is die grootste markte vir DeLush. Die wynkelder se visier is nou op die Laeveld gerig. “Ons vaar ook goed in Namibië en Botswana en het pas die handelsmerk in Zimbabwe bekend gestel. Sowat 25% van die wyn (ongeveer 1 miljoen liter) word in ons buurlande verkoop.”
Volgens Koos was dit belangrik om die regte logistieke infrastruktuur en verspreidingskanale gereed te kry om die handelsmerk vlerke te gee.
“Jy moet soldate op die grond hê om die boodskap te versprei, soos verteenwoordigers wat met die groot sjebiens kommunikeer. Ons gebruik ook ‘aktiveringsvoertuie’, wat toegerus is met ’n yskas en ‘boombox’ om promosies aan te bied. Bemarking in die township lei ook nie noodwendig tot verkope in die township nie, want in dié segment koop verbruikers ook gereeld wyn by supermarkte buite die townships. Die wyn vaar baie goed in Suid-Afrika by afsetplekke naby braairestaurante, soos shisa nyama, en in Namibië by karwas-ondernemings.”
Soortgelyke handelsmerke soos 4th Street en Four Cousins het reeds die weg gebaan in dié verbruikerskategorie. Saam met DeLush doen die handelsmerke baie om die wynverbruik per kop in SuidAfrika hoër te maak, wat voordelig is vir die hele wynbedryf.
Dit is ook van net soveel waarde vir Orange River Cellars se sowat 700 lede.
“Ons probeer meer en meer van ons wyn onder ons eie handelsmerke verkoop. As ons al ons wyn onder ons eie handelsmerke verkoop, is die boere wat aan ons lewer op die beste plek, want dan verdien hulle die maksimum wat hulle kan.”
— LUCILLE BOTHA