ONTSOUT SEEWATER
Deur sonenergie te gebruik, kan jy see- of brak water gebruik om vars water te maak.
Dr. Angel Bosch i Bosch van die Spaanse maatskappy Aqua Abib het ’n metode ontwikkel waarvolgens die son se hitte in die nok van ’n piramide se “dak” versamel word. Die dak bestaan uit ’n buitenste laag van robuuste, deursigtige polikarbonaat-dakplate om sonstrale deur te laat. Dit dien egter ook as ’n isoleerder om hitte binne te hou. Onder dié deursigtige dakplate word ’n laag swart plastiek van 500 mikron geïnstalleer om die son se hitte daar te laat konsentreer. Die lug tussen die twee lae verhit en stuur dan die hitte na die sentrale hoogtepunt van die dak, waar dit meer as 100 °C bereik.
Seewater of brak water word as ’n sproei in dié gekonsentreerde hitte onder die nok van die dak ingespuit. Soute en enige ander onsuiwerhede kristalliseer in die hitte, terwyl die water verdamp en opstyg. Die waterdamp word in ’n kolom in die middel van die piramide ingesuig tot in ’n ondergrondse reservoir.
Hoe groter die temperatuurverskil is tussen die water in die reservoir en die lug in die hittekamer teen die dak, hoe doeltreffender sal die oes van vars water wees. Daarom word die reservoir vroegoggend, voor sonop, met behulp van koue lug verkoel om kondensasie te maksimaliseer. Die soute en ander onsuiwerhede val van bo af in ’n tweede pyp tot op die grond. Deur sonpanele op die dak aan te bring, kan volledig in die stelsel se elektrisiteitsbehoefte voorsien word, sonder om die doeltreffendheid van die verhittingsproses te belemmer.
’n Sirkel met ’n radius van 2,5 m op die nok van die dak is deursigtig en die 2,5 m hoë mure het groot ruite sodat genoeg lig die piramide kan binnedring sodat die aanleg as ’n lamhok of ’n kweekhuis vir die verbouing van groente gebruik kan word. Weens die hitte-uitruilproses en die behoefte aan koue vir die reservoir kan die atmosfeer in die kweekhuis baie goed bestuur word vir optimale gewasverbouing. Prys: Op aanvraag.
NAVRAE: Dr. Angel Bosch i Bosch, e-pos: angel. bosch@aqua-abib.com, sel +34 63 45 68 008.