Besproei slim met Netafim
Netafim is ’n wêreldleier op die gebied van slim besproeiingsoplossings, wat bydra tot ’n volhoubare toekoms vir die landbou, kweekhuise en landskapbestuur.
Netafim is ’n Israelse maatskappy wat sedert 1965 die pionier is in die druprevolusie wat tot ’n paradigmaskuif in presisiebesproeiing gelei het.
Mnr. Etienne Erasmus, wat al jare lank in die besproeiingsbedryf werk, lei die maatskappy in Suid-Afrika. Netafim Suid-Afrika, met sy hoofkantoor en produksie-aanleg in Kraaifontein naby Kaapstad, is al langer as 25 jaar die voorloper in die Suid-Afrikaanse mark vir drupbesproeiingstegnologie. Danksy ses landboukundiges en 13 tegniese verkoopspersoneel in Suider-Afrika kan boere verseker wees van goeie diens en gehalte.
Drupbesproeiing het groot omwentelings in die moderne landbou meegebring. Deesdae word misstowwe en selfs oesbeskermingsmiddels ook deur middel van druplyne toegedien.
Die belangrikste gewasse wat by Netafim se tegnologie baat vind, sluit in lusern, wyndruiwe, suikerriet, mielies, amandels, haselneute, appels, sitrus, piesangs, koffie, olywe, uie, aartappels, sojabone en tamaties.
Dit is egter die digitale landbou en die vereistes van presisieboerdery wat Netafim in sy veld onderskei. Die NetMaize App getuig daarvan. Die NetMaize App, ’n gratis slimfoontoepassing gemik op mielieprodusente, help om opbrengste te verhoog deur besproeiingslande se watertoediening te optimaliseer na gelang van omstandighede op die land, soos transpirasiekoers en grondvoginhoud.
Die NetMaize App is spesifiek vir drupbesproeiingstelsels ontwerp en help graanprodusente om beter besluite te neem oor die besproeiing van gewasse. Só sal die toepassing presiese besproeiingsvereistes van die gewas bepaal en vir die boer vooruitskattings gee van die waterbehoefte.
Die toepassing is beskikbaar vir Apple se iPhone (App Store) en Android-slimfone (Google Play).