Mahindra skop nes in Durban
Dié Indiese motormaatskappy is op pad om ’n eg Suid-Afrikaanse vervaardiger te word.
Mahindra, ’n Indiese vervaardiger van bakkies en sportnutsvoertuie, het in Maart vanjaar ’n produksie-aanleg in Durban geopen. Die aanleg sal gedeeltelik vervaardigde Mahindra Pik Up-modelle van Indië ontvang en voltooi, met die doel om sowat 40% van die waarde van die voertuie in Suid-Afrika aan te koop.
Die nuwe aanleg verteenwoordig ’n belegging van sowat R10 miljoen en sal sowat 25 nuwe werksgeleenthede in die eerste fase skep. Produksie het reeds in Mei begin en in Julie was volle produksie al aan die gang.
Die aanleg is met die samewerking van AIH Logistics gebou en kan sowat 200 voertuie per maand monteer. Hierdie syfer kan aansienlik verhoog word deur ekstra skofte of ander Mahindra-modelle by te voeg, na gelang van die mark se behoefte.
Mnr. Rajesh Gupta, nuwe hoof van Mahindra in Suid-Afrika, sê die nuwe monteeraanleg is die volgende stap in dié vervaardiger se plan om ’n volwaardige vervaardigingsaanleg in Suid-Afrika op te rig. Hierdie aanleg sal mettertyd ook die res van Afrika bedien en as ’n platform dien vir ander produkte uit die Mahindra-stal.
“Mahindra het aansienlik gegroei sedert die maatskappy in 2004 in Suid-Afrika gevestig is. Die afgelope vyf jaar is die handelsnaam een van die vyf snelgroeiendste handelsname in Suid-Afrika. Mahindra se bakkiereeks tel onder die ses gewildste bakkiehandelsname in Suid-Afrika,” sê Gupta.
Mahindra het die afgelope vyf jaar met ’n saamgestelde koers van 4,6% gegroei en ook sy reikwydte in Suid-Afrika en in die buurlande verhoog met die opening van nuwe handelaars reg oor die streek.
Die aanleg is gebou in die nuwe nywerheidsontwikkelingsone (SEZ) langs die King Shaka Internasionale Lughawe buite Durban en bied maklike toegang tot die Durbanse hawe en snelwegtoegang tot al die groot stede in Suid-Afrika.
WERKVERSKAFFER
Mahindra & Mahindra is ’n reusekonglomeraat met belange in verskeie bedrywe, waaronder voertuie, telekommunikasie, staalvervaardiging, finansiële dienste, energieverskaffing en die vervaardiging van motorbote. Die maatskappy het ’n omset van meer as $19 miljard (sowat R253 miljard) per jaar en het meer as 240 000 mense in 100 lande in diens.
LANDBOUPRODUKREEKS
Mnr. Arvind Mathew, hoof van internasionale belange by Mahindra, sê een van die volgende moontlike stappe is om ’n reeks landbouprodukte by die monteeraanleg te bou.
Mahindra is die wêreld se grootste vervaardiger van trekkers en het ook ’n reeks ander landbouprodukte in sy portefeulje. Verskeie van sy trekkers was reeds op die Nampo-oesdag te sien en ’n aantal is al goedgekeur vir plaaslike gebruik.
NUWE BAADJIE
Die Mahindra Pik Up is einde verlede jaar opgeknap en in Suid-Afrika bekend gestel. Die modelreeks is een van die gewildste reekse in die groep se portefeulje, danksy sy bekostigbaarheid en die beskikbaarheid van werkesel- en leefstylmodelle.
Die Mahindra Pik Up word aangedryf deur Mahindra se veelbesproke 2.2 mHawk-turbodiesel-enjin. Die enjin lewer drywing van 103 kW en wringkrag van 320 N.m.
Pik Up-modelle met 4x2-aandrywing gebruik gemiddeld 7,7 liter brandstof per 100 km en die 4x4-modelle 7,9 liter per 100 km. Alle modelle is toegerus met ’n sesgang-handratkas.