Monotec is die maklike keuse
Monotec se planters word gebou om die meeste presisie te verseker en is altyd — seisoen ná seisoen — betroubaar.
Monotec gebruik die beste moontlike konstruksie, toedieners en stelsels vir sy pasgemaakte planters. Hierdie planters word spesiaal vervaardig na gelang van die boer se spesifieke vereistes en elke planter kan dus presies inskakel by die klant se bestaande boerderystelsel.
Monotec se Quad-Max is dus ’n gekoppelde seksieplanter wat beskikbaar is as ’n geenbewerkingsmodel én as ’n konvensionele plantermodel.
Die Quad-Max is doelgemaak om as ’n groot werktuig moeilike grondsoorte baas te raak, waaronder landerye met los grond en kontoere waarop die boer, te midde van die probleme wat die verskillende oppervlaktes bied, moet plant.
Een van die vele voordele van dié werktuig is dat daar geen swaar raamwerk is wat boontoe of vorentoe opvou tydens vervoer tussen landerye nie. Die raamwerk is plaaslik vervaardig.
Aangesien Monotec dit hier bou, kan verskeie konfigurasies gebruik word om presies by die boer se behoefte aan te pas.
Die toediening van saad en bemesting kan óf deur meganiese grondaandrywing óf hidrouliese motors óf elektriese motors op elke ry toegepas word.
Die Quad-Max is met ’n kort draaisirkel ontwerp. Dit het ’n vervoerbalk aan die sykant van die planter wat vervoer volgens die lengte van die planter eenvoudig en gemaklik maak.
Die groot bakke waarin saad en kunsmis kom, word deur swaartekrag gevoer. Dit geld vir vloeibare én droë kunsmis. Danksy hierdie praktiese kenmerk is waaiers, hidrouliese motors en horisontale leweringspype oorbodig.