AMANDELS: NUWE KULTIVARS GETOETS

Sewe nuwe amandelkultivars uit Spanje en Italië word tans in die Wes-Kaap op die proef gestel, terwyl die landboumaatskappy ZZ2 al sowat drie jaar lank die Amerikaanse amandelkultivar Independence kommersieel aanplant. Só sê mnre. Michael Oosthuizen, tegniese bestuurder by die Unlimited Group in die Paarl, en Thomas Mehl, besturende direkteur van Cape Almonds, ’n filiaalmaatskappy van ZZ2.

Mehl sê afgesien van Independence, wat reeds op groot skaal kommersieel in veral die Wes-Kaap aangeplant word, word ander Amerikaanse kultivars ook geëvalueer. “Baanbrekerswerk word gedoen omdat ons aan alle fasette van die bedryf – plant, oes, siektebestryding, onderstamme en markte, aandag gee.”

Albei stem saam dat belangstelling in amandelproduksie drasties toeneem. “Ons voer jaarliks 3 300 ton amandels in. Teen die tempo waarvolgens die plaaslike bedryf groei, gaan ons binnekort selfvoorsienend wees,” sê Mehl.

Oosthuizen sê die grootste deel van die plaaslike amandeloes (250 ton tot 300 ton) word veral na lande in die Verre-Ooste uitgevoer. “Swakker neute word plaaslik bemark. Dit is egter ver onder die plaaslike vraag en ons moet invoer.”

Sowat 500 ha is onder amandelboorde in die Wes-Kaap, meestal by Oudtshoorn, Montagu, Riebeek-Kasteel, Worcester en Durbanville. Die gemiddelde opbrengs is 2,5 ton per ha.