Sonkrag ál goedkoper vir boere
Met die wêreldwye uitbreiding van die sonkragbedryf en al hoe meer opsies wat beskikbaar is, het die gebruik van sonpompe die afgelope paar jaar ook in Suider-Afrika toegeneem. Nou kan die Afrika-son behoorlik benut word.
Die uitbreiding in produksie van sonpompe het welkome gevolge vir Suid-Afrikaanse boere. Die pompe is baie betroubaarder en die verskeidenheid produkte en verskaffers om uit te kies het toegeneem.
Die wêreldwye uitbreiding van die sonkragbedryf en die toename in die produksie van sonpanele het veroorsaak dat die prys van sonpanele sedert 2010 met sowat 80% afgeneem het. Die grootste deel van Suid-Afrika kry meer son as wind, wat sonpompe aantrekliker maak as windpompe.
Sonpompe werk met sonenergie en het dus laer lopende koste as pompe wat deur kragopwekkers met brandstof aangedryf word. Sonpompe het betreklik lae onderhoudskoste en is nie arbeidsintensief nie.
VEILIGHEID
Diefstal van sonpanele bly ’n groot probleem vir boere, veral omdat sonpompe meestal op verafgeleë plekke geïnstalleer word. Sonpanele kan op verskeie maniere beveilig word, soos om dit in ’n raam vas te sweis, wat dit moeilik maak om die panele te verwyder sonder om dit te breek. ’n Alarmstelsel kan ook geïnstalleer word. ’n Boodskap word na die boer se selfoon gestuur sodra beweging op die panele registreer.
SOORTE POMPE
Die diafragmatipe gelykstroompompe was ’n paar jaar gelede baie gewild en het al menige boer uit ’n moeilike situasie gered. Die voordele van hierdie pompe is dat dit goedkoop is en maklik geïnstalleer kan word; die meeste van die kleiner pompe koppel regstreeks aan een sonpaneel.
Verskeie van dié pompe van wisselende gehalte word ingevoer én plaaslik vervaardig. Die meeste boere met ondervinding van dié pompe sal egter daarmee saamstem dat dit nie ’n volhoubare oplossing bied nie. Dit vereis meer onderhoud en het ’n korter gebruikstyd vergeleke met ander produkte wat beskikbaar is.
Die gebruik van borsellose gelykstroompompe het meer onlangs in Suid-Afrika posgevat en word allerweë beskou as ’n verbetering op die diagragmatipe pompe. Dié pompe is betroubaarder en dus ook gewilder. Dit is veral die kleiner reeks (onder 1 000 watt) wat op die monopompbeginsel werk, wat op groot skaal van die Ooste af ingevoer word.
Die pompe is veral doeltreffend wanneer ’n klein hoeveelheid water teen hoë druk benodig word, byvoorbeeld diep boorgate met swak water.
WISSELSTROOM
Verskeie internasionale pompmaatskappye bied al jare lank volledige sonpompreekse in Suid-Afrika aan waar gelykstroom van die sonpanele af na wisselstroom omgeskakel word.
Verskillende pompmeganismes word gebruik, waaronder monopomp- en sentrifugale pompmeganismes. Dié pompe is oor die algemeen baie doeltreffend en van hoogstaande gehalte.
Dit bevat ook intelligente elektronika wat baie opsies en wye gelykstroom-invoerspannings toelaat. Dit is gevolglik ook aanpasbaar met die meeste soorte sonpanele. Hierdie pompe is egter betreklik duur en die herstelkoste is hoog.
DOMPELPOMPE
Die gebruik van gewone wisselstroom-dompelpompe, wat deur middel van generiese veranderlike-spoedaandrywing (VSD) na sonkrag omgeskakel word, raak al hoe meer gesog.
Dié metode behels die gebruik van beproefde, betroubare en goedkoop toerusting (standaard-dompelpomp) wat deur sonpanele aangedryf word. Danksy die modulêre samestelling van die sonpanele, VSD, motor en pomp is probleemoplossing op lang termyn betreklik maklik en goedkoop.
Die ontwerp van die stelsel moet deur ’n kenner gedoen word om die doeltreffende werking daarvan te verseker.