Chinese mark wink vir SA
Die varsproduktebemarkingsvereniging PMA het ’n groot spoor in die markomgewing vir vars produkte in China. Met ’n kantoor en lede in China, bring die PMA geleenthede na sy lede, wat lei tot besigheid en handelsvloei.
Boere wonder dalk wat Suid-Afrika met China verhandel en waar die potensiaal lê waarvan almal praat. “Lemoene oorheers die waarde van produkte wat na China verskeep word, en het van 2016 tot verlede jaar byna verdubbel. Pomelo’s is die naasgrootste produk. Die Chinese hou baie van Suid-Afrikaanse lemoene en sowat 10% van hul ingevoerde lemoene kom uit Suid-Afrika; en 11% van die ingevoerde pomelo’s is van hier,” sê me. Lindie Stroebel, algemene bestuurder van PMA Suider-Afrika.
“Hoewel die uitvoer van druiwe na China en die mark daarvoor moeiliker is, is dit steeds ’n produk met groot groeipotensiaal. Suid-Afrika het maar ’n skrale 1,3% deel aan die totale druiwe-invoer deur China om in die groot vraag te voorsien.
“Die land het eers relatief onlangs toegang tot die Chinese appelmark gekry, en die groei is reeds noemenswaardig. Daar is groot potensiaal vir verdere groei, veral in die lig van die handelsoorlog tussen China en Amerika, waartydens China ’n 15%-tarief op Amerikaanse landbouprodukte geplaas het. Dit gee ’n geleentheid vir Suid-Afrika om appeluitvoer na China te stimuleer en die markaandeel daarvoor te vergroot,” sê Stroebel.
Die plaaslike bedryf hou die ontwikkelinge rondom die handelsooreenkomste tussen SuidAfrika en China dop, om hopelik binnekort ook avokado’s en ander hoëwaardeprodukte, soos kersies, uit te voer. Luidens ’n PMA-verslag oor hoe om na China uit te voer, is die mees gepaste wyse van marktoegang afhanklik van dié faktore:
Die regulatoriese toegang van spesifieke produkte vanaf ’n spesifieke land; Verspreidingskanale wat die uitvoerder beoog om te gebruik; en Die uitvoerder se keuse van ’n Chinese invoervennoot. Die PMA kan advies en kontakte hieroor bied. Oor vereistes om die Chinese mark te kan betree, sê mnr. George Liu, uitvoerende hoof van Frutacloud in China en spreker op die PMA Fresh Connections, Chinese het nou meer geld en hulle wil juis ingevoerde, pleks van plaaslike produkte koop. Hulle wil ook spesifiek vars vrugte, pleks van massa-vervaardigde gemorskos koop.
Boere kan verskeie Chinese kopers – onder wie van die grootste Chinese aanlyn handelaars ter wêreld – ontmoet op die konferensie van PMA Fresh Connections se New Connectionssessie (Woensdag 15 Augustus, 09:00-12:30).