Nuwe kuilvoermielies blink uit in Vryburg
Voerkrale in Schweizer-Reneke en Vryburg in Noordwes het tonne voer per maand nodig. Daarvoor staan Pannar se uitstekende kuilvoermieliepakket bankvas agter boere. Mnr. Nelis Potgieter, verkoopsverteenwoordiger in dié streek, vertel meer oor die bestaande en nuwe mieliebasters wat hy graag aanbeveel.
Kuilvoermielies,veral dié onder besproeiing, moet vinnig opkom en sterk kan groei en soveel moontlik voer per hektaar kan lewer. ’n Goeie weerstand teen siektes, soos noordelike blaarskroei (witroes) en Phaeosphaeria-blaarvlek, is ’n bonus. En Pannar se staatmaker-geelkuilvoermielies, soos PAN 3R-700BR, PAN 3P-502R en PAN 3Q-740BR, het regmerkies langs hul name vir al hierdie voordele.
Hierdie ultravinnige geel basters lewer topopbrengste wanneer die beste bestuurspraktyke en besproeiingskedulering toegepas word. In hierdie toestande het Pannar se ultravinnige basters besonder goeie opbrengste vir kuilvoer opgelewer.
Die besproeiingspakket is saamgestel uit konvensionele, stronkboorder-weerstandbiedende, glifosaat-onkruiddoderverdraagsame en stapelgeenbasters. Met hul vinnige groeityd en onder besproeiing is dit moontlik om twee aanplantings te doen en dit in wisselbou met koring (wintergraan) te plant.
BESPROEIING
“In die besproeiingsgebiede by Vryburg en Schweizer-Reneke val maar min reën. Die gemiddelde reënval is 350 mm-450 mm per jaar en dit val gewoonlik eers in die laat somer. Die boorgatwater is soms te min en die water kan alkalies wees. Tog is dié water lewegewend en in die sanderige van dié omgewing presteer ons mielies uitstekend,” sê mnr. Nelis Potgieter, verkoopsverteenwoordiger van Pannar in dié streek.
Potgieter sê windskade kan ’n groot probleem ná opkoms wees en daarom is hy beïndruk deur hoe sterk en vinnig die mielies ná opkomsgroeiomuitdiewindte kom. Hier is die basters wat hy graag vir boere in die westelike gebied aanbeveel wat kuilvoermielies onder besproeiing plant.
PAN 3Q-740 BR
Hierdie stapelgeenbaster lewer topprestasie onder besproeiing in al die produksiestreke en handhaaf ’n uitstekende prestasie in die Landbounavorsingsraad se besproeiingsproewe.
“PAN 3Q-740BR se opkoms is sterk en hy groei vinnig uit die wind uit. Sy hoë opbrengs en goeie staanvermoë maak dit moontlik om ’n plantestand van 75 000-80 000 plante per hektaar in hierdie omgewing te plant. Dit is ’n enkelkoppige mielie en as standaard plant boere op rywydtes van 0,75 m.
“Die meeste besproeiingsboere mik vir twee aanplantings met hierdie kuilvoermielie. Die eerste plantdatum is gewoonlik van 10-15 September en dan sny hulle in die eerste week van Januarie. Die tweede aanplanting is gewoonlik van 8-12 Januarie en dan sny hulle teen rondom 10 Mei,” sê Potgieter.
Dié mielie se uitstekende opbrengs lewer in Potgieter se bedieningsgebied60tontot70ton kuilvoer per hektaar (gesny op 68%-70% vog). Dit het ’n goeie staanvermoë en graangehalte.
PAN 3P-502R
Dié toevlugbaster werk goed saam met PAN 3D-736BR, PAN 3Q-740BR, PAN 3R-786BR en PAN 3R-700BR, sê Potgieter. En dis geskik as ’n konvensionele kuilvoermielie.
“Hy lewer gemiddeld 61 t/ha kuilvoer met die eerste aanplanting. Hy kry wel ’n bietjie wurmskade, maar bly goed bestand teen noordelike blaarskroei.”
NUWE BASTERS
PAN 3R-786BR en PAN 3R-700BR is albei nuwe basters in die pakket wat in toetse ook in dié geweste belowende resultate opgelewer het.
“Meer saadvolumes hiervan sal in die toekoms beskikbaar wees. Ons noem dit ’n ‘bankbestuurdermielie’, want hy is so mooi dat jou bankbestuurder jou lening dadelik sal toestaan as jy hierdie mielies vir hom wys,” sê Potgieter skertsend. Albei is vinnige groeiers met uitstekende opbrengs vir kuilvoer.
“In ons geweste het proewe met PAN 3R-786BR gemiddeld 61 t/ha (teen 61%-voginhoud) gelewer. PAN 3R-700BR se gemiddelde kuilvoerlewering was 65 t/ha (teen 62%-voginhoud). Dit lewer topgehalte kuilvoer en kan later die kultigrond var PAN 3Q-740BR verbysteek in gewildheid.”
WESTELIKE GEBIED
Potgieter beveel aan dat boere wat onder besproeiing kuilvoermielies plant, kyk na ultravinnige groeiers sodat hulle twee aanplantings kan baasraak. Daarvoor moet basters teen ’n groeityd van 100 en 120 dae tussen plant- en snydatum gebruik word.
“Indien boere egter kuilvoermielies op droëland plant, beveel ek PAN 6R-680R aan.”
Dit is ’n mielie wat stadiger groei (mediumgroeiklas, 180 dae van planttyd tot snytyd). Dié baster met sy glifosaat-onkruiddoderverdraagsaamheid lewer ’n uitstekende, stabiele prestasie. Dit is ’n goeie keuse waar hoë onkruiddruk ondervind word.
PAN 6R-680R word ook as toevlugsoord vir PAN 6R-710R aanbeveel. Dit het ’n goeie verdraagsaamheid teen kopvrot. Dié baster is sterk meerkoppig met ’n goeie staanvermoë en matige spruitvorming. Sy aanbevole stand by Vryburg is 15 000 tot 24 000 plante per hektaar op droëland.
Hy is beïndruk deur hoe sterk en vinnig die mielies groei.