VROU SE ROL IN MODERNE BOERDERY
Me. Adéle du Plessis is ’n bemarkingsbestuurder by ’n besigheid op Ermelo waar sy ’n oggendpos het. Smiddae gee sy volle aandag aan haar en Lion se twee dogtertjies, Lara en Mia. Mnr. Lion du Plessis is Mpumalanga se Jongboer van die Jaar vir 2018. Tóg kry sy dit reg om ook nog tyd in te ruim om met die boerdery te help. “Lion aanvaar volle verantwoorderlikheid vir elke afdeling in die boerdery en ek staan hom by en help waar ek kan.”
Sy is veral doenig met die uitbreiding van hul eie handelsmerk, Du Plessis Boerdery. Adéle het self die handelsmerk ontwerp omdat dié tipe werk deel van haar studies was toe sy B.Com. Geoktrooieerde Bemarking aan die Noordwes-Universiteit gestudeer het. Sy het dié kwalifikasie met onderskeiding behaal. Sy het ook haar honneursgraad in entrepreneurskap en bemarking aan die NWU verwerf.
“’n Vrou het beslis ’n rol in ’n moderne boerdery, veral omdat ’n boerdery ’n
leefwyse is. Dis nie ’n beroep met vaste werksure nie, maar is sewe dae per week deel van ons lewe. Vroue is deesdae meer sakegeoriënteerd en kan só ook waardevolle bydraes tot die boerderybesigheid lewer. Dis veral baie belangrik om my man te ondersteun. Die man hoef nie alleen die laste en bekommernisse te dra en probleme op te los nie.”
Lion sê dit is baie belangrik om ’n klankbord te hê wanneer hy groot besluite moet neem. Adéle het ook op ’n plaas grootgeword en ken die omstandighede, eise en uitdagings wat daarmee verband hou.