VESTIG JOU ARMMANSLUSERN REG
Doen moeite met die vestiging van armmanslusern om ’n hoë hooi-opbrengs te verseker, sê mnr. Lion du Plessis, Mpumalanga se Jongboer van die Jaar vir 2018. “Nes die vestiging van enige hooigewas, geld dit ook armmanslusern. Moenie jou aan mites, stories en teorieë steur wat nie gestaaf kan word nie.”
Dis byvoorbeeld nie wenslik om die gewas op die swakste grond te vestig nie, want dan sal dit swak groei en gou vergaan. Laat doen eers presisiegrondontledings en grondregstellings om seker te maak die balans in die grond is reg. Dit sal verseker dat die grond gewasse optimaal sal laat groei.
Die nadeel van armmanslusern is volgens Lion dat die gewone veldgrasse dit oor ’n tydperk van vier tot ses jaar kan oorneem. Op dele van sy plaas het die armmanslusern al heeltemal vergaan. Dit is hoekom dit so belangrik is om die voedingstatus van die grond vooraf te bepaal en aanvullende bemesting voor vestiging te doen. Dan kan dit tot tien jaar weiding en hooi verskaf.
Daarteenoor is dit ’n voordeel dat armmanslusern nie ná vestiging met stikstof bemes hoef te word nie. Dit is ’n peulplant en die wortels vervaardig dus self stikstof. “Kyk net mettertyd na die fosfaat- en kaliumvlak.”
Lion sny sy armmanslusern een keer per seisoen en baal dit in Januarie/ Februarie. Hy haal gemiddeld 7,5 ton per hektaar hooi af.
Hy plant ook oulandsgras, waarvan hy gemiddeld 9 ton hooi per hektaar afsny.