WITLUISE OP BROODBOME

Ek het skielik witluise op my broodbome. Die bome is oortrek en die blare het reeds begin geel word. Hoe kan ek dit behandel? Luise kom op baie plante voor, veral op windstil plekke. Drie soorte luise kom hoofsaaklik op broodbome voor: Plant-, wol- en dopluise. Hulle word deur miere versprei of deur middel van “kruipers” (bekend as onvolwasse luise) in die geval van dopluise. Kruipers is beweeglik, maar die volwasse luise is nie. Plantluise ontwikkel vlerke in sekere lewenstadia, wat hulle in staat stel om maklik te versprei.

Broodboomblare is sag en sappig tydens die vorming- en ontwikkelingstadia, waarna hulle verhard. As die blare nog sag is, is plantluise die grootste probleem omdat plantluise dan op die blaarsap kan voed. In hierdie groeistadium kan hulle baie skade aanrig en die blare misvorm.

Sodra die blare egter verhard, is plantluise nie meer ’n probleem nie omdat hulle nie op die harde blaar kan voed nie.

In die hardeblaarstadium kan dopluise ’n probleem word omdat hulle aan die blare heg en daar bly. Dopluise suig die sap uit die volwasse blaar en veroorsaak skade as hulle nie bestry word nie. Die blare kan vergeel en hul vermoë om te fotosinteer verloor. Die beste vorm van dopluisbestryding is deur middel van sistemiese insekdoders, of plaagbestryding, wat die plantsap vir ál drie luissoorte giftig maak.

BESTRYDING

Verskeie opsies bestaan vir luisbestryding. Die eerste opsie (en ook een van die ouer produkte) is Oleum, ’n mineraalolie wat die luise versmoor. Oleum werk die beste op dopluise en sal nie plant- en wolluise bestry nie. Oleum moet dus net op volwasse broodboomblare (harde blare) gebruik word.

Die volgende bestrydingsmiddels verwys na al die neonikotinoïede. Dit is hoogs sistemies en werk uitstekend. Enige van die volgende sal goed werk: Imidaklopried (handelsname Kohinor reg. nr. L8447 of Confidor reg.nr. L7240) as ’n grondtoediening; Asetamipried (handelsnaam Mospilan reg.nr. L8192 of Doublestar reg.nr. L8884 – albei produkte van Nulandis) as ’n blaartoediening; en Tiametoksam (handelsnaam Actara reg.nr. MAPP13728) as ’n grondtoediening. Dr. André Cilliers is ’n ontwikkelingsbestuurder by die landbouchemiese maatskappy Nulandis.