’n Nuwe stoetery vir ’n nuwe millennium
Bykans 60 jaar se prestasietoetsing en sorgvuldige seleksie en teling met die Afrikaner gee vir mnr. Estienne Cronjé ’n voorsprong in sy eie stoetkudde wat hy sedert die eeuwisseling by Winburg in die Vrystaat bedryf.
Mnr. Estienne Cronjé en sy broer, Pierre-André, het albei pa Johan Cronjé se liefde vir die Afrikanerbees geërf. Hy het die Grootkuilstoetery met sy talle spogdiere en kompetisiewenners dekades lank opgebou.
Estienne boer al sedert 1990 en het die Millennium-Afrikanerstoetery in 2000 begin toe sy pa vir hom ’n paar verse gegee het om sy eie stoetery te begin. Ná sy pa se dood is die Millennium-stoetdiere en sy erfdeel van die Grootkuil-stoetery by die Deelfontein-stoetery ingelyf. Dié proses is in 2013 afgehandel, maar die Millennium-voorvoegsel is behou.
Die plaas is naby Winburg geleë en het goeie, natuurlike weiding, wat meestal Vrystaatse soetveld en ook ’n bietjie suurveld bevat. Die plaas se drakrag is sowat 6 ha per grootvee-eenheid en daar loop ongeveer 300 stoetkoeie.
Die saaiery op die plaas verskaf ook aanvullende rantsoene in die winter wanneer die koeie op die mieliereste loop.
“Tydens die droogte het die kudde steeds goed gevaar en ons moes die minimum aanvullende voer vir hulle aanry. Danksy die Afrikaner se taai geaardheid trek hierdie ras ’n bietjie makliker deur strawwe tye,” sê Estienne.
Hy weet ook presies wanneer sy diere se prestasie op peil is, verbeter of verswak.
“Ons doen al prestasietoetsing sedert 1960 toe my pa daarmee begin het. Dit stel my nou in staat om seleksie vir spesifieke eienskappe met groot vertroue te doen en die kudde te bestuur.”
TELING
Estienne kyk veral na goeie groei, vrugbaarheid, reproduksie, loopvermoë en temperament.
“Ons klante is baie tevrede met die tipe Afrikaners wat ons teel en hoe maklik dit is om met beeste uit ons kudde te werk. Die Afrikaner verg eenvoudig net soveel minder aandag as ander rasse waarmee ek al geboer het. Ons koeie het min kalfprobleme en uitstekende moedereienskappe, wat roofdiere op ’n afstand hou.”
Op die komende nasionale veiling op Kroonstad gaan tien verse en twee bulle uit dié stoetery in aanbod wees.
“Wanneer ek bulle koop, kyk ek na groei en vrugbaarheid, maar veral na die moeder se kalfrekord. Ek wil weet of sy goed vir haar kalwers sorg en almal speen. Iets waarop ek ook bedag is, is diere se temperament in die ring op die dag van die veiling. ’n Dier met ’n senuagtige geaardheid of een wat maklik kwaad word, kan potensieel ’n ‘moeilike’ bees wees wat homself of veehanteerders kan beseer. Sover ek weet, is temperament oorerflik en ek soek nie ‘wilde’ gene in my kudde nie.”
Estienne sê ’n goeie temperament en vleissagtheid hou verband met mekaar.
“Die slagpale is ’n vreemde plek en lei noodwendig tot spanning by slagdiere. As dit ’n rustige bees is wat nie maklik stres nie, stel hy minder adrenalien vry en die vleisgehalte is beter.”
GENOOTSKAP
As ’n bestuurslid van die Afrikanerbeestelersgenootskap is Estienne tevrede met die genootskap se pogings om die ras te verbeter.
“Ons is ook besig met die genomiese ontleding van die ras en om te kyk hoe tegnologie op dié gebied ons telers kan help om nóg beter diere te lewer. Só lê ons daarop klem om die sterk punte uit te bou en om die swak punte te verbeter deur die deurlopende veredeling van die ras.”
Hy is ook baie beïndruk met die genootskap se pogings om Afrikanervleis te bemark.
“Die ontwikkeling van die Afri Beef-handelsmerk is van groot belang vir die volhoubaarheid van die ras en om die mark uit te bou.”
NAVRAE: Mnr. Estienne Cronjé, e-pos: estiennec@gmail.com, sel 083 677 6859.