Afrikaner staan sterk in Musina
Vertroue en vryheid is die twee hoekstene waarop Chufshah Mazal Afrikaners gebou is. Dit is ook hoe die twee vennote die kudde en plaas bedryf onder die naam Chufshah Edms. Bpk., wat hulle aanvanklik net vir die plesier begin het.
Chufshah se Afrikanerstoetkudde Mazal loop in die Musinaomgewing waar die kwik in die somer gereeld bó 40 °C draai. Hier is nie plek vir passasiers nie en elke bees in die kudde moet sy plek kan volstaan en sy waarde bewys.
Die plaas waar die Afrikanerkudde Mazal loop, se naam is boonop Vryheid, en mnre. Otto Gerner en Frank Horden leef dié woord se betekenis uit in hul vennootskap.
“Vertroue is ’n groot woord en ons het ook vertroue in die Afrikaner-beesras, asook die telersgenootskap. Ons het ons eerste beeste op die nasionale veiling op die Pretoriase skouterrein gekoop. Mattfield, ons eerste bul, het ons by dr. Pieter de Kock, voorsitter van die Afrikanerbeestelersgenootskap, gekoop,” sê Gerner.
“Die stoetery groei bestendig en ons vertroue in dié beeste ook. Ons boer in ’n taai omgewing en weet dus ons gaan ’n puik en geharde bees hier teel tussen die kremetartbome, mopanieveld en steekgras.”
PRESTASIE EN TROTS
Die kudde se prestasie en die telers se oordeel is vroeg beloon.
“Ons het in ons eerste jaar ’n sertifikaat gekry vir die beste vordering en in ons tweede jaar ’n sertifikaat vir die beste klein stoetery. Frank en ek is sakemanne, maar boer ook hier aan die Limpopo, oos van Musina. Vir ons is die historiese sy van die ras ook van belang. Ons besit ook ’n mooi span osse en ossewaens,” sê Gerner.
“Om deel te wees van die Afrikanerbeestelersgenootskap en die AfriBeef-handelsmerk is vir ons ’n groot voorreg en iets waarop ons trots is.” NAVRAE: E-pos: gerner@ protectitcc.co.za of manie@ pharon4.co.za ;sel 079 498 0025; faks 084 430 0152. Mnr. Frank Horden, sel 082 494 9356.