GOEIE VOEDING BEPERK VEEARTSKOSTE
Wat by ’n bok, skaap of koei se bek ingaan, kan bepalend vir sy gesondheid, kondisie en reproduksievermoë wees, het dr. Sewellyn Davey, staatsveearts op Malmesbury, op ’n droogtehulpwerksessie op Hopefield gesê.
Rumenontwikkeling is belangrik omdat mikroörganismes alle voedingstowwe wat diere inkry, daar begin afbreek.
Daarna word die boublokke van die voedingstowwe in die derms opgeneem.
Skaap- en boklammers word net met ’n melkpens gebore. Namate hulle ouer word, ontwikkel die grootpens. Die gehalte van die voer wat die jong diere kry, is baie belangrik om te verseker dat die grootpens baie villi ontwikkel. Villi is “vingertjies” aan die rumenwand wat die oppervlakte daarvan vergroot om meer voedingstowwe op te neem.
Dieregesondheid begin by goeie ooivoeding. Dit help dat teenliggaampies opbou terwyl hulle dragtig is en daar genoeg teenliggaampies in die bies vir die lammers is wanneer die ooie lam. Lammers kan daardie teenliggaampies net inkry as hulle pasgebore is. “Dit is hoekom dit so belangrik is dat pasgebore lammers in die eerste paar uur ná geboorte bies inkry.”
Ramme moet ook goeie voeding kry, “maande voor hulle by die ooie gesit word”.
Voeding is belangrik, maar diere moet ook ingeënt word. “Inenting is baie maklik, maar vir goeie immuniteit het jy kos nodig. As ’n dier ’n proteïentekort het, kan hy nie teenliggaampies produseer nie.”